ЖРВИ мен тұмауға қарсы эпидемиологиялық маусым 2025 жылдың 1 қазанынан 2026 жылдың 30 сәуіріне дейін жалғасады. Осы кезеңге байланысты Шымкент қаласының медицина ұйымдары кешенді дайындық жұмыстарын аяқтады.
Емханаларда тұрғындарға қолжетімді болу үшін қосымша 81 телефон желісі және 71 автокөлік бөлінді. ЖРВИ және тұмаумен ауырған науқастарды жатқызуға 367 төсек орын дайындалды, оның 322-сі инфекциялық ауруханаларға, қалғаны балалар ауруханаларына бөлінді.
Қала дәріханаларында вирусқа қарсы дәрілер қоры жеткілікті: тамифлю – 8 740 дана, реленза – 5 137 дана, оксалин майы – 1 350 дана. Сонымен қатар санитариялық-профилактикалық іс-шаралар жоспары бекітілді.
Медициналық ұйымдарда маска тағу режимі енгізіліп, фильтр-зоналар ұйымдастырылған. Температуралық режим мен дезинфекция күшейтілген. Жүкті әйелдер мен 1 жасқа дейінгі балаларға күнделікті патронаж және үй жағдайында алғашқы көмек көрсету шаралары қолға алынған.
Білім беру ұйымдарында да алдын алу жұмыстары жүргізілуде. Әр мектеп пен балабақшада таңертеңгі сүзгі өткізу, санитарлық талаптарды сақтау, сыныптар мен кабинеттерге антисептиктер орнату қатаң бақылауға алынған. Егер бір сыныптағы оқушылардың 20-30 пайызы сырқаттанса, сабақтар уақытша онлайн форматқа ауыстырылады.
Мамандардың айтуынша, ЖРВИ мен тұмаудың алдын алудың ең тиімді тәсілі — вакцина алу және жеке гигиенаны сақтау. Дәрігерлер тұрғындарды өз денсаулығына бейжай қарамай, маусымдық екпеден өтуді және қоғамдық орындарда сақтық шараларын ұстануды ұсынады.
Қаланың медициналық қызметтері мен білім беру ұйымдары осы эпидемиологиялық маусымға толық дайындықтарын көрсетіп, тұрғындардың денсаулығын қорғауға барынша күш салып жатыр. Вакцинация мен алдын алу шаралары бойынша кешенді жұмыстар жалғасып, қауіпсіздік деңгейі барынша қамтамасыз етілген. Атап айтқанда, балалар мен жасы ұлғайған азаматтарға ерекше назар аударылып, профилактикалық шаралар мен қажетті медициналық көмек тұрақты түрде көрсетіледі.
Қала тұрғындары үшін бұл маусымда профилактикалық іс-шаралардың тиімділігі маңызды рөл атқарады. Әрбір адам вакцинация алып, гигиеналық талаптарды сақтап, аурудың алдын алуға үлес қоса алады. Қауіпсіздік пен денсаулық әрқайсымыздың қолымызда, сондықтан қала тұрғындарын осы шараларға жауапкершілікпен қатысуға шақырамыз. Тек бірлесіп, эпидемияның таралуын тежей аламыз!
Comments