Шымкент қаласы мәслихатының төрағасы Бахадыр Нарымбетов Әл-Фараби атындағы қалалық ғылыми-әмбебап кітапханада азаматтарды жеке мәселелері бойынша кезекті қабылдау өткізді. Қабылдауға жалпы алғанда 6 азамат жазылған, олардың әрқайсысы өздерінің әлеуметтік мәселелерін көтерді. Қала тұрғындары негізінен әлеуметтік мәселелерді көтерді.
ҚР Мәдениет қайраткері Әбдіхалық Әбдірайымов қаланың мәдениет саласын жандандыруда бірқатар ұсыныстарды алға тартты. Ол белгілі ақын-жазушылардың аллеясын ашу, әр салада еңбегі сіңген азаматтар туралы фильм түсіру, өнер фестивальдерін өткізу сынды мәдени маңызы зор мәселелерді атап өтті.
Қала мәслихатының төрағасы халықтың мәдениетін көтеру қажет екенін, бұл мәселелердің әрқайсысы маңызды және өзекті екенін, ұтымды ұсыныстар екенін атап өтті. Ендігі ретте айтылған ұсыныстардың барлығы да назарға алынып, идеологиялық тұрғыдан терең зерттеу жұмыстары жүргізіледі.
Қала тұрғыны Гүлмира Уселбекова баспана кезегінің жылжымай жатқанына шағымданып, көмек сұрады. Б.Нарымбетов тұрғын үй кезегі тек қана заң аясында шешімін табатынын айтып, заңдылықтың сақталуы маңызды екенін ескертті.
Сонымен қатар, қабылдауда тұрғындар 236 орамда көшелерді жарықтандыру, жаңа атаулар беру, М.Мәметова көшесіне (235 орам) асфальт төсеу сынды өтініштерін жеткізді. Бұл өтініштер тұрғындардың қауіпсіздігі мен қолайлылығын арттыру мақсатында ұсынылған, және қала инфрақұрылымын жақсартуға бағытталған жобалар болып табылады. Б.Нарымбетов бұл мәселелердің қала өмірін сапалы деңгейге көтеруге көмектесетінін атап өтті.
Іс-шараға қалалық мәдениет, тілдерді дамыту және архивтер, білім, дене шынықтыру және спорт, тұрғын үй, жолаушылар көлігі және автомобиль жолдары басқармасының өкілдері қатысып, тұрғындардың сұрақтарына толыққанды әрі жан-жақты жауап берді. Олар барлық ұсыныстарды мұқият тыңдап, алдағы уақытта шешімдер қабылдау кезінде әртүрлі басқармалардың бірігіп жұмыс істейтінін мәлімдеді. Бұл қабылдау қала тұрғындарының мәселелерін уақытында шешу үшін қажет диалогты орнату мен тиімді әрекеттер жасауға бағытталған үлкен қадам болып табылады.
Comments