Әл-Фараби ауданындағы Ө.Жәнібеков атындағы №9 IT лицейінің құрылыс алаңына жұмыс тобы барып, құрылыс барысымен танысты. «AMANAT» партиясы Шымкент қалалық филиалы жанындағы Партиялық бақылау комиссиясы кезекті зерделеу жұмысын жүргізді. Іс-шараның негізгі мақсаты – партияның 2023–2027 жылдарға арналған сайлауалды бағдарламасында көзделген басым бағыттардың орындалуын бақылау.
Зерделеу жұмыстарына Партиялық бақылау комиссиясының төрағасы Ғани Ташқараев, Әл-Фараби аудандық филиалының партиялық бақылау комиссиясының төрағасы Бердіқұл Садықов, комиссия мүшелері Рүстем Ерменбеков, Эльмира Созақбаева және партиялық бақылау инспекторы Айжаркын Әбілдаева қатысты.
Жұмыс тобы Ө.Жәнібеков атындағы №9 IT лицейінің құрылыс алаңына барып, құрылыс барысымен танысты. Бақылау барысында мектеп ғимаратының сапасы, жобалық-сметалық құжаттамаға сәйкестігі, мердігер мекеменің келісімшарт бойынша алған міндеттемелерді орындау деңгейі және жұмыстардың белгіленген мерзімге сай жүргізілуі егжей-тегжейлі талқыланды.
Сонымен қатар, пайдаланылып жатқан құрылыс материалдарының сапасы мен еңбек қауіпсіздігі талаптарының сақталуы да басты назарға алынды. Жиын барысында оқушылардың санитарлық-гигиеналық жағдайын жақсарту мақсатында болашақ мектеп ғимаратына душ кабиналарын орнату ұсынысы айтылды. Бұл бастама, әсіресе дене шынықтыру сабақтарынан кейінгі жағдайды ескере отырып, оқушылардың денсаулығы мен жайлылығын қамтамасыз етуге бағытталған.
Білім беру саласын дамыту, заманауи оқу инфрақұрылымымен қамтамасыз ету – партияның басты басымдықтарының бірі. Осы мақсатта жүргізіліп жатқан бақылау жұмыстары алдағы уақытта да тұрақты түрде жалғасын табады.
Осындай шаралар арқылы партия қоғам алдындағы жауапкершілігін айқын көрсетіп, тұрғындармен кері байланысты нығайтуға және өзекті әлеуметтік мәселелерді шешуге нақты үлес қосып келеді.
Әл-Фараби ауданындағы бұл сияқты маңызды жобалар алдағы уақытта да партия бақылауында болып, халықтың игілігіне қызмет ететініне сенім мол.
Comments