СЫБАЙЛАС ЖЕМҚОРЛЫҚ ТӘУЕКЕЛДЕРІНЕ ЖҮРГІЗІЛГЕН ІШКІ ТАЛДАУ НӘТИЖЕЛЕРІ БОЙЫНША ЖИЫН ӨТТІ

Арыс қаласы әкімінің аппарат басшысы Талғат Анашбековтің төрағалығымен қала әкімдігінің мәжіліс залында маңызды жиын өтті. Жиын барысында мемлекеттік қызмет саласындағы сыбайлас жемқорлық тәуекелдерін азайту, алдын алу және тиімді бақылау тетіктерін жетілдіру мәселелері қаралды.
Іс-шараға қалалық қоғамдық кеңес төрағасы Тәңірберген Әсіл, Арыс қаласы әкімінің аппаратындағы Мемлекеттік құқықтық жұмыс және терроризмге қарсы іс-қимыл бөлімінің басшысы Бауыржан Тульбасиев, қала әкімінің аппарат қызметкерлері, ауылдық округ әкімдіктерінің жауапты мамандары, сондай-ақ қоғамдық кеңес жанындағы сыбайлас жемқорлыққа қарсы іс-қимыл жөніндегі комиссия мүшелері қатысты.
Жиынның күн тәртібінде мемлекеттік органдардың ішкі әкімшілік құрылымдарындағы сыбайлас жемқорлық тәуекелдеріне жүргізілген ішкі талдаулар нәтижелері және оларды болдырмауға бағытталған нақты ұсыныстар қаралды. Бұл шара – ел Президентінің және Мемлекеттік қызмет істері агенттігінің тапсырмаларына сәйкес жүргізіліп отырған жүйелі жұмыс барысының бір бөлігі болып табылады.
Жиында сөз алған Мемлекеттік құқықтық жұмыс және терроризмге қарсы іс-қимыл бөлімінің басшысы Бауыржан Тульбасиев Арыс қаласының әкімдігіне қарасты дербес бөлімдер мен ауылдық округ әкімдерінің аппараттарында жүргізілген сыбайлас жемқорлық тәуекелдеріне ішкі талдау қорытындылары туралы кеңінен баяндады. Ол баяндама барысында бірқатар салаларда тәуекелдердің бар екендігін атап өтіп, оларды жою үшін қолға алынуы тиіс нақты іс-шаралар мен тетіктерге тоқталды. Сонымен қатар, есеп беру, қаржылық рәсімдер мен кадрлық саясаттағы ашықтықты қамтамасыз ету бағытында ұсыныстар білдірді.
Б.Тульбасиевтің айтуынша, ішкі талдау барысында анықталған мәселелердің қатарында кейбір әкімдік құрылымдарында құжат айналымының тиімді жүргізілмеуі, мемлекеттік қызметтер көрсету кезінде регламент талаптарының толық сақталмауы және ақпараттық жүйелерді пайдаланудың жеткіліксіздігі сияқты жайттар кездескен. Бұл, өз кезегінде, белгілі бір деңгейде жемқорлық көріністеріне жол ашуы мүмкін екені атап өтілді.
Жиын барысында қоғамдық кеңес мүшелері мен комиссия өкілдері де өз пікірлерін білдіріп, сыбайлас жемқорлыққа қарсы мәдениетті қалыптастыруда қоғамдық бақылаудың рөлін арттыру, тұрғындармен ашық кері байланыс орнату және құқықтық түсіндіру жұмыстарын жандандыру қажеттігін айтты.
Қорытынды сөз сөйлеген жиын төрағасы Талғат Анашбеков мемлекеттік қызметшілердің кәсіби әдебі мен жауапкершілігіне ерекше тоқталып, лауазымдық міндеттерді үлгілі әрі мінсіз атқару қажеттігін еске салды. Ол өз сөзінде:
«Мемлекеттік қызмет – бұл халықтың сенімімен тікелей байланысты. Әрбір қызметкер азаматтардың құқықтары мен заңды мүдделерін қорғауды басты міндеті деп түсінуі керек. Біз заңдылық пен тәртіпке негізделген нәтижелі, тиімді мемлекеттік басқару жүйесін қалыптастыруға тиіспіз», – деді.
Сондай-ақ аппарат басшысы мемлекеттік қызметшілер арасында сыбайлас жемқорлыққа қарсы мәдениетті арттыру үшін тұрақты негізде семинарлар, түсіндіру кездесулері өткізілуі тиіс екенін айтты. Ол аппарат құрылымдарына сыбайлас жемқорлықтың алдын алуға бағытталған нақты жоспар әзірлеуді және оның орындалуын бақылауда ұстауды тапсырды.
Жиын барысында нақты тапсырмалар мен ұсынымдар қабылданып, оларды іске асыру бойынша тиісті бөлімдерге мерзім белгіленіп, жауапты тұлғалар бекітілді.
Осылайша, Арыс қаласы әкімдігі сыбайлас жемқорлықпен күресте жүйелі әрі кешенді тәсіл ұстанып, ашықтық пен есептілік қағидаттарын алдыңғы қатарға шығарып отыр. Бұл бағыттағы жұмыстар алдағы уақытта да жалғасын тауып, мемлекеттік аппараттың тиімділігі мен тұрғындар сенімін арттыруға қызмет етпек.