2025 жылдың 23 мамыры күні Қаратал ауданында айтулы шара – «Үздік шопан – 2025» республикалық байқауы өтті. Байқау Қазақстан Республикасында жарияланған Жұмысшы кәсіптер жылы аясында ұйымдастырылды. Іс-шараны «Биязы және биязылау жүнді қой тұқымдары» Республикалық палатасы, «Бақыт Қаратал» ЖШС директоры, аудандық кәсіпкерлер кеңесінің мүшесі Серікжан Бақытұлы Жексембиев және Қаратал ауданы әкімдігі бірлесіп өткізді.
Шопан – ауыл тірегі
Шопан мамандығы – ауыл шаруашылығы саласындағы ең көне, әрі аса маңызды кәсіптердің бірі. Бұл салада еңбек етіп жүрген жандардың арқасында қой шаруашылығы өркендеп, ұлттық дәстүрлер сақталып, еліміздің азық-түлік қауіпсіздігі қамтамасыз етіледі. Малға тұрақты күтім жасау – сапалы жүн мен ет өндірудің негізі, ал бұл өнімдер ішкі және сыртқы нарықта жоғары сұранысқа ие.
Байқау барысы
Байқау үш кезеңнен тұрды:
Бірінші және үшінші тур – теориялық білімге негізделген сұрақ-жауап кезеңі;
Екінші тур – практикалық тапсырмаларды орындау.
Бұл формат қатысушылардың кәсіби шеберлігі мен тәжірибесін жан-жақты таныстыруға мүмкіндік берді. Байқауға Алматы және Жетісу облыстарынан келген үздік шопандар қатысты.
Жеңімпаздар мен жетістіктер
Байқау қорытындысы бойынша Қаратал және Кеген аудандарының шопандары жеңімпаз және жүлдегер атанды. Бұл – өңірдегі қой шаруашылығының әлеуеті жоғары екенінің айқын дәлелі.
Сала мамандарының басқосуы
Іс-шараға ҚР Ауыл шаруашылығы министрлігі Мал шаруашылығы департаментінің және Жетісу облысы Ауыл шаруашылығы басқармасының мал шаруашылығы бөлімінің өкілдері, Жетісу облысы Кәсіпкерлер Палатасының Қаратал ауданы филиалының директоры қатысты. Байқау шеңберінде мамандар тәжірибе алмасып, қой шаруашылығындағы заманауи тәсілдер мен инновациялық шешімдерді талқылады.
«Үздік шопан – 2025» байқауы – саладағы үздіктерді ынталандырып қана қоймай, қой шаруашылығын жаңа деңгейге көтеруге бағытталған маңызды бастама болды.
Қобланды АБЕНОВ
Comments