2024 жылдың екінші қарашасында «Бүгінгі медиа: Біліктілік және қоғаммен байланыс» семинар-тренингі одан əрі жалғасуда. Бұл іс-шара Шымкент қаласы әкімдігінің қолдауымен, Бейсенкүл Нарымбетова басқаратын «Серпін» қоғамдық қорының ұйымдастыруымен өтуде. Бүгінгі семинар-тренинг «Сандық журналистика жəне жасанды интеллект: жасанды интеллекттің əлеуеті мен журналистикаға əсері» жөніндегі тақырыпқа арналды. Оны журналист, медиаменеджер, Ш.Шаяхметов атындағы «Тіл — қазына» республикалық ұлттық-ғылыми практикалық орталығының Бас директоры Мақпал Жұмабаева жүргізді. Спорт комментаторы, шолушы Есей Жеңісұлы «Спорт журналистикасының бүгіні: жетістіктер, проблемалар, тіл тазалығы» туралы мазмұнды əңгімеледі. Еліміздің ел болып қалуына тілдің көп рөлі бар екеніне кеңінен тоқталды. Спорт тақырыбына, ондағы проблемаларға жан-жақты тоқталып жүрген журналист Бақтияр Тайжан мен спорт журналисі Ілияс Жолдас шеберлік сыныбын өткізді. Екі тақырыпта да журналистер үшін өте өзекті мəселелер қозғалды.
Журналистер түрлі сұрақтар қойып, жауаптар да алды. Білмегеніміз бен үйренеріміз көп екен. Дəл қазіргідей жасанды интеллект дамып бара жатқан тұста бұл семинар-тренингтің бізге берері мол болуда.
Comments