Отбасы – қоғамның басты тірегі, ұлттың болашағын қалыптастыратын маңызды құндылықтардың бірі. Отбасындағы татулық, өзара құрмет пен түсіністік – қоғамдағы тұрақтылық пен қауіпсіздіктің негізі саналады. Сондықтан бүгінгі таңда отбасы институтын нығайту, әйелдер мен балалардың құқықтарын қорғау, сондай-ақ тұрмыстық зорлық-зомбылықтың алдын алу мәселелері мемлекеттік саясаттың маңызды бағыттарының біріне айналып отыр.
Осы мақсатта Төлеби ауданында құқық қорғау органдары мен қоғамдық ұйымдардың бірлесуімен профилактикалық және ақпараттық-түсіндіру жұмыстары жүйелі түрде жүргізілуде. Аудандық полиция бөлімі және «Шаңырақ» жастар мен жас отбасыларды қолдау орталығы» қоғамдық бірлестігінің ұйымдастыруымен аудан аумағында гендерлік саясатты қолдау және отбасындағы тұрмыстық зорлық-зомбылықтың алдын алу бағытында бірқатар іс-шаралар қолға алынған.
Кезекті ақпараттық-түсіндіру кездесуі Жоғарғы Ақсу ауылдық округінде ұйымдастырылып, оған аналар қауымы қатысты. Іс-шара барысында отбасы құндылықтарын сақтау, әйелдер мен балалардың қауіпсіздігін қамтамасыз ету және қоғамда зорлық-зомбылыққа қарсы мәдениетті қалыптастыру мәселелері кеңінен талқыланды.
Кездесу барысында мамандар қатысушыларға гендерлік теңдіктің қоғамдағы маңызы туралы жан-жақты түсіндірме жұмыстарын жүргізді. Бүгінде әйелдер мен ерлердің құқықтары мен мүмкіндіктерінің тең болуы – қоғамның тұрақты дамуының маңызды шарттарының бірі екені айтылды. Сонымен қатар отбасындағы өзара сыйластық пен түсіністік балалардың дұрыс тәрбиеленуіне және қауіпсіз орта қалыптасуына тікелей әсер ететіні атап өтілді.
Жиында отбасы институтын нығайту және ұлттық құндылықтарды дәріптеу мәселесіне ерекше назар аударылды. Мамандардың айтуынша, отбасындағы береке мен татулық – қоғамдағы тұрақтылықтың кепілі. Сондықтан балаларды мейірім мен қамқорлыққа тәрбиелеу, үлкенге құрмет, кішіге ізет көрсету сияқты ұлттық құндылықтарды сақтау маңызды міндеттердің бірі болып қала береді.
Кездесу барысында тұрмыстық зорлық-зомбылықтың алдын алу жолдары мен оның қоғамға тигізетін кері әсері кеңінен түсіндірілді. Мамандар зорлық-зомбылықтың физикалық, психологиялық, экономикалық және моральдық түрлері болатынын айтып, оның отбасы мүшелерінің денсаулығы мен психологиялық жағдайына ауыр зардап әкелетінін жеткізді. Әсіресе балалардың зорлық-зомбылық куәсі болуы олардың болашақ өміріне кері ықпал ететіні атап өтілді.
Құқық қорғау саласының өкілдері әйелдер мен балалардың құқықтарын қорғау бағытындағы заңнамалық талаптарға тоқталып, тұрмыстық зорлық-зомбылыққа қатысты жауапкершілік мәселелерін түсіндірді. Сонымен қатар қиын жағдайға тап болған азаматтардың қайда жүгінуі қажет екені, қандай көмек түрлері көрсетілетіні және қолдау орталықтарының қызметі туралы ақпарат берілді.
Мамандардың айтуынша, тұрмыстық зорлық-зомбылықтың алдын алу тек құқық қорғау органдарының ғана емес, бүкіл қоғамның ортақ міндеті. Бұл бағытта отбасы мүшелері, білім беру ұйымдары, қоғамдық ұйымдар мен жергілікті тұрғындар бірлесіп жұмыс істеуі қажет. Әсіресе қоғамда зорлық-зомбылыққа бейжай қарамау мәдениетін қалыптастыру маңызды.
Іс-шара барысында қатысушылар өздерін толғандырған сұрақтарын қойып, мамандардан қажетті кеңестер алды. Аналар қауымы бала тәрбиесі, отбасыдағы қарым-қатынас, құқықтық қолдау және психологиялық көмек мәселелері бойынша пікір алмасты. Мұндай кездесулер тұрғындардың құқықтық сауаттылығын арттырып қана қоймай, қоғамда қауіпсіз әрі сенімді орта қалыптастыруға ықпал етеді.
Бүгінде елімізде заң мен тәртіпті нығайту, тұрмыстық зорлық-зомбылыққа «нөлдік төзімділік» қағидатын қалыптастыру және азаматтардың қауіпсіздігін қамтамасыз ету бағытындағы жұмыстар кезең-кезеңімен жүзеге асырылуда. Осы ретте Төлеби ауданында ұйымдастырылып жатқан профилактикалық шаралар қоғамдағы тұрақтылықты сақтауға және отбасы институтын нығайтуға бағытталған маңызды бастамалардың бірі болып саналады.
Бақытты отбасы – берік қоғамның кепілі. Сондықтан отбасы құндылықтарын сақтау, әйелдер мен балалардың қауіпсіздігін қорғау және зорлық-зомбылықтың алдын алу бағытындағы жұмыстар алдағы уақытта да жалғасын таба бермек.
Comments