ТҮРКИЯЛЫҚ ORZAX КОМПАНИЯСЫ ҚАЗАҚСТАНДА ӨНДІРІСІН КЕҢЕЙТУ ҮШІН ТҮРКІСТАНДЫ ТАҢДАДЫ

Түркияның жетекші фармацевтикалық компанияларының бірі – ORZAX – Түркістан облысында биологиялық белсенді қоспалар (ББҚ) шығаратын жаңа зауыт салу жоспарын жариялады. Бұл жоба өңірдің әлеуметтік-экономикалық дамуына үлкен серпін бермек. Жалпы құны 40 миллион АҚШ долларын құрайтын өндірістік кешеннің құрылыс-монтаж жұмыстары 2025 жылы басталып, 2026 жылдың соңына дейін іске қосылуы жоспарлануда.
Түркістан облысының әкімі Нұралхан Көшеров пен ORZAX компаниясының басшылығы арасындағы кездесу барысында жобаның негізгі аспектілері кеңінен талқыланды. Ең бастысы, зауытты Мемлекет басшысының тапсырмасымен құрылған «TURAN» арнайы экономикалық аймағында орналастыру мүмкіндігі қарастырылды. Бұл аймақта компания жеңілдетілген салықтық және әкімшілік режимдерді пайдаланып, тиімді әрі заманауи өндіріс ұйымдастыра алады.
Жаңа зауыт іске қосылғаннан кейін жылына 35 миллион қорап биологиялық белсенді қоспалар шығарылады деп күтілуде. Бұл өнім түрлері денсаулықты жақсартуға, иммунитетті қолдауға, сондай-ақ жалпы өмір сапасын арттыруға бағытталған. Өндіріс көлемінің ұлғаюы 500-ден астам жаңа жұмыс орнын құруға мүмкіндік береді, бұл өңір тұрғындары үшін үлкен әлеуметтік маңызға ие. Жұмыс орындарының ашылуы жергілікті халықтың табысын арттырып, экономикалық белсенділікті жандандырады.
Облыс әкімі Нұралхан Көшеров жобаның маңыздылығын ерекше атап өтіп, жергілікті әкімдік тарапынан барлық қажетті қолдау көрсетілетінін хабарлады. Атап айтқанда, инфрақұрылыммен қамтамасыз ету, құжаттамаларды рәсімдеу және рұқсат беру процестерін жеделдету сынды міндеттерге басымдық беріледі.
– Түркістан – ашық және серіктестікке дайын өңір. Біз Түркиямен бауырлас елміз. Түркиялық компанияның өңірімізге келіп, осындай ірі инвестициялық жобаны жүзеге асыруға ниетті болуы – біздің облыс үшін зор мүмкіндік. Жаңа зауыттың құрылысы облыс экономикасын дамытуға үлкен үлес қосып, жүздеген азаматты тұрақты жұмыспен қамтамасыз етеді. Біз бұл бастаманы толық қолдаймыз және жобаның табысты іске асуына барлық жағдай жасаймыз. Өздеріңізбен тікелей байланыста боламыз, – деді Нұралхан Көшеров.
ORZAX – Түркияда орналасқан, табиғи ингредиенттер негізінде биологиялық белсенді қоспалар өндіретін халықаралық деңгейдегі жетекші компаниялардың бірі. Қазіргі таңда компания 100-ден астам өнім түрін шығарады, олардың арасында пробиотиктер, өсімдік экстрактылары, арнайы формулалар, Омега-3, дәрумендер мен минералдар, коллагендер бар. ORZAX Түркияда рецептсіз берілетін өнімдер нарығында көшбасшы болып табылады және өнімдері әлемнің 50-ден астам еліне экспортталады.
Осы инвестициялық жоба Түркістан облысының фармацевтикалық өндіріс саласын дамытуға жаңа серпін береді. Сонымен қатар, өңірдің экономикалық тұрақтылығын арттырып, халықаралық деңгейдегі ірі компаниялармен ынтымақтастықты нығайтады. Биологиялық белсенді қоспаларды шығаратын бұл зауыт заманауи технологиялар мен сапалы шикізатты пайдалана отырып, отандық және халықаралық нарықтағы сұранысты толық қамтамасыз етуге бағытталған.
Жалпы алғанда, ORZAX компаниясының Түркістан облысындағы жаңа зауыт құрылысы өңірдің инвестициялық климатын жақсартуға, жоғары технологиялық өндірістерді дамытуға және халықтың әлеуметтік әл-ауқатын арттыруға ықпал етеді. Мұндай жобалардың жүзеге асуы Қазақстан мен Түркия арасындағы экономикалық байланыстардың нығаюына, тәжірибе мен инновацияларды алмасуға жол ашады. Бұл – екі елдің өзара тиімді ынтымақтастығын дамытудағы маңызды кезең.