Қазақстан Президенті Қасым-Жомарт Тоқаев Корея Республикасының Президенті Ли Чжэ Мённің шақыруымен Сеулге мемлекеттік сапармен барды. Сапар аясында мемлекет басшысы Кореяның жоғары лауазымды тұлғаларымен, мемлекет және қоғам қайраткерлерімен, сондай-ақ ірі бизнес өкілдерімен кездесіп, екі ел арасындағы саяси, инвестициялық, технологиялық және өнеркәсіптік ынтымақтастықты одан әрі дамыту мәселелерін талқылады.
Мемлекеттік сапар барысында Қазақстан мен Корея арасындағы стратегиялық серіктестікті жаңа деңгейге көтеруге бағытталған бірқатар маңызды бастама көтерілді. Атап айтқанда, автокөлік өнеркәсібі, энергетика, газ өңдеу, логистика, тамақ өнеркәсібі, қонақ үй бизнесі, цифрландыру және жасанды интеллект салаларындағы бірлескен жобаларға басымдық берілді.
Қазақ-корей қарым-қатынасының маңызы артып келеді
Сеулде Корея Республикасының мемлекет және қоғам қайраткерлеріне II дәрежелі «Достық» орденін тапсыру рәсімі өтті. Қасым-Жомарт Тоқаев Қазақстан мен Кореяны өзара құрмет пен ортақ мүдде байланыстыратынын атап өтті.
Президенттің айтуынша, екі ел арасындағы саяси диалог тұрақты дамып, сауда-экономикалық байланыстар нығайып келеді. Қазір Қазақстан мен Корея машина жасау, энергетика, металлургия, озық технологиялар және басқа да стратегиялық салаларда бірқатар ірі жобаны жүзеге асыруда.
Мемлекет басшысы Корея Республикасын Қазақстанның стратегиялық серіктесі ретінде бағалайтынын айтып, екі елдің көпқырлы ынтымақтастығын одан әрі кеңейту маңызды екенін жеткізді.
Президент Қазақстандағы корей диаспорасының екі ел арасындағы достықты нығайтудағы ерекше рөліне де тоқталды. Қазақстанда жүз мыңнан астам корей ұлтының өкілі тұрады. Корё-сарам қауымдастығы елдің қоғамдық-саяси және экономикалық дамуына елеулі үлес қосып келеді. Қазақстанда корей мәдени орталықтары жұмыс істейді, Алматыдағы академиялық корей театры қызмет атқарады, корей тілінде газет пен радио хабарлары шығарылады.
Кореяның мемлекет және қоғам қайраткерлері марапатталды
Рәсім барысында Корея Республикасы Ұлттық жиналысының депутаттары Мэн Сон Гю мен Ли Чжэ-кан, Сеул киберуниверситетінің президенті Ли Сан Гюн, Хангук шет тілдері университетінің профессоры әрі Орталық Азияны зерттеу институтының директоры Сон Ён Хун және Hyundae General Hospital көпбейінді клиникасының директоры Ким Бу Соп II дәрежелі «Достық» орденімен марапатталды.
Қасым-Жомарт Тоқаев бұл марапатты қазақ халқының корей халқына деген шынайы құрметінің белгісі деп атап, марапат иелері алдағы уақытта да екі ел арасындағы байланысты нығайтуға үлес қосатынына сенім білдірді.
Пан Ги Мунмен жаһандық күн тәртібі талқыланды
Мемлекет басшысы БҰҰ-ның бұрынғы Бас хатшысы, Жаһандық жасыл даму институтының төрағасы Пан Ги Мунмен кездесті.
Кездесуде орнықты даму, климаттың өзгеруі және «жасыл экономикаға» көшу мәселелері сөз болды. Президент дамушы елдердің жасыл даму моделіне өтуіне қолдау көрсететін Жаһандық жасыл даму институтының маңызын атап өтті.
Пан Ги Мун Қазақстанның орнықты даму бағытындағы жетістіктерін жоғары бағалап, жаһандық климат күн тәртібі аясындағы ынтымақтастықты жалғастыруға дайын екенін білдірді.
Сонымен қатар тараптар Біріккен Ұлттар Ұйымын реформалау және ұйымның қазіргі заман талаптарына бейімделуі жөнінде пікір алмасты.
Hanwha Қазақстанды технологиялық алаң ретінде қарастырады
Қасым-Жомарт Тоқаев Hanwha Group вице-төрағасы Ким Дон Вонмен кездесіп, инвестициялық және технологиялық ынтымақтастықтың перспективаларын талқылады.
Президент Қазақстанда ұлттық жасанды интеллект экожүйесін қалыптастыруға және цифрлық инфрақұрылымды дамытуға басымдық беріліп отырғанын айтты.
Осы ретте мемлекет басшысы Hanwha Group компаниясына Қазақстанды Орталық Азия нарығына шығатын технологиялық алаң ретінде пайдалануды ұсынды. Бұл жаңа технологиялар тарту, жоғары технологиялық өндірістерді дамыту және өңірлік нарықтарға шығу мүмкіндігін кеңейтуге жол ашуы мүмкін.
Ким Дон Вон Hanwha Group-тың Қазақстанмен ынтымақтастықты 1997 жылы бастағанын атап өтіп, компанияның елдегі цифрландыру және басқа да жобаларға қатысуға қызығушылық танытып отырғанын жеткізді.
Lotte Қазақстандағы инвестициялық жобаларын кеңейтеді
Президент Lotte Group басқарма төрағасы Дон Бин Шинмен кездесуде компанияның Қазақстандағы қызметін кеңейту перспективаларын талқылады.
Lotte-нің Қазақстандағы негізгі бағыттарының бірі – тамақ өнеркәсібі. Қасым-Жомарт Тоқаев компанияның «Рахат» брендіне қатысты жобаларын және Алматы мен Шымкенттегі өндірістік алаңдарды жаңғырту жұмыстарын атап өтті.
Сонымен қатар Lotte Global Logistics компаниясының көлік-логистика инфрақұрылымын дамыту және Қазақстанның өңірлік әрі халықаралық нарықтарға шығу мүмкіндігін арттыру жоспарлары қарастырылды.
Кездесуде қонақ үй бизнесіне де ерекше назар аударылды. Алматыда Lotte брендімен алғашқы қонақ үй салу жобасы қолдау тапты.
Компания Қазақстандағы тамақ өнеркәсібі, логистика және қонақ үй бизнесіне инвестиция салуды жоспарлап отыр. Бұдан бөлек, Lotte Group Alatau City жобасын дамытуға, оның ішінде Iconic Complex кешенін салуға қатысуға ниетті екенін жеткізді.
Hyundai Қазақстандағы өндіріс көлемін ұлғайтуға ниетті
Сапардың маңызды бағыттарының бірі – Қазақстанның автомобиль өнеркәсібін дамыту болды.
Қасым-Жомарт Тоқаев Hyundai Motor Group президенті әрі стратегия және жоспарлау жөніндегі бөлім жетекшісі Сунг Киммен кездесті. Кездесуге Hyundai Engineering және Kia компанияларының өкілдері де қатысты.
Мемлекет басшысы Hyundai Motor Group-тың Қазақстанның автокөлік өнеркәсібіне қосқан үлесін атап өтіп, өндірісті одан әрі локализациялау, автобөлшектер өндірісін ұлғайту және экспорттық әлеуетті күшейту қажеттігін айтты.
Бұл бағытта Алматыдағы Hyundai және Қостанайдағы Kia зауыттарына ерекше маңыз беріліп отыр. Қазақстанды автомобиль өндірісі мен экспорты бойынша ірі өңірлік орталыққа айналдыру және өндірістің толық циклін қалыптастыру перспективті міндеттердің бірі ретінде белгіленді.
Кездесуде электр көлігі өндірісін дамыту мәселесі де қаралды. Атап айтқанда, электромобиль шығару, қосалқы бөлшектер өндіру және қуаттау инфрақұрылымын қалыптастыру бағыттарына назар аударылды.
Hyundai Motor Group Қазақстанды тек ішкі нарық ретінде емес, ТМД елдеріне бағытталған маңызды өңірлік орталық ретінде қарастыратынын мәлімдеді. Компания Қазақстандағы өндірісті кеңейтіп, локализация деңгейін арттыруға дайын екенін растады.
Hyundai Engineering мұнай-газ, өнеркәсіп және инфрақұрылым салаларындағы ынтымақтастықты дамытуға қызығушылық білдірді. Ал Kia өкілдері Қазақстанның ұлттық автомобиль брендін қалыптастыруға үлес қосуға ниетті екенін жеткізді.
Сапар қорытындысында нақты келісімдерге қол жеткізілді
Мемлекет басшысының Кореяға мемлекеттік сапары барысында бірқатар нақты келісімге қол жеткізілді.
Атап айтқанда, Батыс Қазақстан облысында газ өңдеу зауытын салу жөнінде QazaqGaz, Hyundai Engineering және SICIM Kazakhstan компаниялары арасында келісім жасалды.
Сонымен қатар Hyundai Tucson жаңа моделін Қазақстанда өндіру бойынша Hyundai Motor Company мен Astana Motors арасында уағдаластыққа қол жеткізілді.
Бұл жобалар Қазақстанның өнеркәсіптік әлеуетін арттырып, өндірісті локализациялауға, жаңа жұмыс орындарын ашуға және экспорт көлемін ұлғайтуға мүмкіндік береді.
Жалпы, Қасым-Жомарт Тоқаевтың Корея Республикасына мемлекеттік сапары екі ел арасындағы стратегиялық серіктестіктің нақты экономикалық мазмұнын күшейтуге бағытталды. Сапар аясындағы кездесулерде дәстүрлі сауда-экономикалық байланыстармен қатар, жасанды интеллект, цифрландыру, электр көлігі, жоғары технологиялық өндіріс, логистика және жасыл даму сияқты жаңа бағыттарға басымдық берілді.
Кореялық ірі компаниялардың Қазақстандағы жобаларын кеңейтуге ниет білдіруі елдің инвестициялық және өндірістік әлеуетіне деген қызығушылықтың жоғары екенін көрсетеді. Ал қол жеткізілген нақты келісімдер қазақ-корей стратегиялық серіктестігінің жаңа кезеңі нақты инвестициялық және өндірістік жобалармен жалғасатынын аңғартады.
Comments