СТАРТАПТАН – ТҰРАҚТЫ БИЗНЕСКЕ

Қазіргі нарық заманы — идеялар мен инновациялардың уақыты. Бүгінде мемлекеттен көмек күтіп, қол қусырып отыратын патерналистік психология ескірді. Оның орнына тәуекелге бел буып, өз білімі мен қабілетіне сенетін, жаңашыл стартаптарды тұрақты бизнеске айналдырған жас кәсіпкерлердің жаңа буыны келді. Әсіресе, Шымкент сияқты іскерлік рухы жоғары мегаполисте жастар жеңіл өнеркәсіп, креативті индустрия және қызмет көрсету салаларында ерекше белсенділік танытып, өздерінің табыс формуласын қалыптастырып үлгерді.
Шымкенттік жастар арасында креативті индустрия — ең танымал бағыттардың бірі. Бұл саланың негізгі ерекшелігі — үлкен зауыттар мен қымбат қондырғыларды қажет етпейді, мұндағы басты капитал — адамның интеллектуалдық әлеуеті мен шығармашылық ойы.
Қалада заманауи мобилография, IT-шешімдер, дизайн студиялары мен маркетингтік агенттіктер ашқан жас көшбасшылар өте көп. Жай ғана ноутбук пен смартфоннан басталған шағын стартаптар бүгінде ондаған адамды жұмыспен қамтып отырған тұрақты компанияларға айналды. Шымкенттік жас дизайнерлер мен контент-мейкерлер тек жергілікті нарықты ғана емес, республикалық және халықаралық деңгейдегі тапсырыстарды орындап, креативті экономиканың қозғаушы күшіне айналуда.
Жеңіл өнеркәсіп саласында да шымкенттік жас кәсіпкерлердің қолтаңбасы айқын көрініп жүр. Олар тек шетелдік өнімді тасымалдаумен шектелмей, өздерінің бірегей киім желілерін, сәндік бұйымдары мен аяқ киім брендтерін шығаруды қолға алды.
Көпбалалы немесе аз қамтылған отбасылардан шыққан, кезінде мемлекеттік гранттарды тиімді пайдаланған жастар қазір шағын тігін цехтарын үлкен өндіріс орындарына айналдыруда. Олар қазақы нақышты заманауи трендтермен ұштастыра отырып, сапалы әрі қолжетімді өнім ұсынады. Бұл — жастардың «өзімді ғана асыраймын» деген ойдан шығып, ел экономикасына үлес қосуға, отандық өнімді насихаттауға деген ұмтылысының көрінісі.
Қызмет көрсету саласында Шымкент жастары ерекше креативтілік танытып отыр. Олар стандартты дәмхана немесе дүкен ашумен шектелмейді. Бүгінде қалада коворкинг орталықтары, интеллектуалды даму клубтары, заманауи клинингтік қызметтер мен білім беру платформалары қарқынды дамып келеді.
Жас кәсіпкерлер бизнесті басқаруға цифрлық технологияларды енгізу арқылы сервистің деңгейін көтерді. Олардың басты ұстанымы — тұтынушының уақытын үнемдеу және жоғары сапа ұсыну.
Шымкенттік жас кәсіпкерлердің табыс формуласы өте қарапайым: ол — үздіксіз ізденіс, тәуекелшілдік және адал еңбек. Сәтті стартаптың артында қаншама ұйқысыз түндер, қателіктермен жұмыс және өз ісіне деген шексіз махаббат жатыр.
Бұл жастардың өмір жолы — қоғамдағы масылдық психологиясына қарсы ең жақсы балама. Олар мемлекеттен дайын жұмыс орынын күткен жоқ, керісінше, өздері жаңа жұмыс орындарын ашып, өз қатарластарын еңбекке тартып отыр. Стартаптан басталған тұрақты бизнес — бұл жастардың өз тағдырын өз қолына алып, үшінші мегаполистің экономикалық әлеуетін арттыруға қосқан шынайы ерлігі. Нағыз көшбасшылық пен табыс — бос қиялда емес, батыл қадам мен қажырлы еңбекте шыңдалады.