ЖАҢА БУЫН — ЖАҢА ЕҢБЕК ҚОҒАМЫ

Кез келген дамыған қоғамның іргетасы тек экономикалық көрсеткіштермен немесе заманауи технологиялармен ғана өлшенбейді. Оның ең басты діңгегі — қалыптасқан еңбек мәдениеті мен кәсіби этика. Бүгінгі таңда Шымкент мегаполисінде еңбек нарығына жаңа буын — ұрпақтары белсенді араласа бастады. Бұл жастардың жұмысқа, уақытқа және жеке жауапкершілікке деген көзқарасы мүлдем бөлек. Қазіргі жастар арасында уақытты құрметтеу, кәсіби жауапкершілік және үздіксіз өзін-өзі дамыту сияқты қасиеттерді қалыптастыру — масылдық психологияны жойып, бәсекеге қабілетті қоғам құрудың негізі болып табылады.
Ескі түсініктегі «оңтүстіктің уақытымен келу» немесе той-томалаққа, жұмысқа кешігіп жүру сияқты жағымсыз стереотиптер бүгінгі жаңа буынның еңбек мәдениетіне мүлдем жат. Қазіргі Шымкент жастары уақыттың ең қымбат капитал екенін жақсы түсінеді. Олар тайм-менеджмент, яғни уақытты тиімді жоспарлау дағдыларын ерте жастан меңгеруде.
Жұмысқа, іскерлік кездесулерге дер кезінде келу — бұл жай ғана ереже емес, бұл — серіктесіңе, жұмыс берушіге және өз ісіңе деген шынайы құрметтің көрінісі. Уақытқа ұқыпты қараған жас маман нарықта әрдайым жоғары бағаланады. Олар уақытты бос өткізуден қашады, әрбір минутты тиімді пайдаланып, нәтижеге жұмыс істеуді басты орынға қояды.
Еңбек мәдениетінің екінші маңызды элементі — жауапкершілік. Масылдық көңіл-күйге салынған адам үнемі сыртқы бақылауды, бұйрық күтуді қалайды. Ал жаңа буынның белсенді өкілдері өз жұмысына, қабылдаған шешімдеріне өздері жауап беруге дайын. Олардың бойында ішкі тәртіп өте жоғары.
Мейлі ол қашықтан жұмыс істейтін IT-маманы болсын, зауыттағы оператор немесе қызмет көрсету саласының қызметкері болсын — тапсырманы уақытылы әрі сапалы орындау олар үшін кәсіби абырой мәселесі. Мұндай жауапкершілік сезімі қалыптасқан ортада «мемлекет немесе бастық бәрін жасап беруі керек» деген патерналистік түсінікке орын қалмайды. Жастар өз болашағын өздері қалайтынын жақсы біледі.
Қазіргі нарықта бір рет диплом алып, өмір бойы сол біліммен ғана күн көру мүмкін емес. Жаңа буынның еңбек этикасындағы ең басты ерекшелігі — Lifelong learning, яғни «өмір бойы білім алу» концепциясы. Шымкент жастары өз мамандықтары бойынша біліктіліктерін арттыру үшін үнемі ізденіс үстінде жүреді.
Олар онлайн курстар оқиды, шет тілдерін меңгереді, жаңа цифрлық құралдарды игереді. Осылайша, өздерінің икемді дағдыларын дамыта отырып, нарықтағы құнын өсіреді. Өзін-өзі дамытуға құштар жас ешқашан жұмыссыз қалмайды және мемлекеттің әлеуметтік жәрдемақысына тәуелді болмайды.
Шымкентте жаңа еңбек мәдениетінің қалыптасуы — мегаполистің алға басуының басты кепілі. Уақытты бағалайтын, жауапкершіліктен қашпайтын және үнемі дамуға ұмтылатын жастар қоғамның қозғаушы күшіне айналып отыр. Еңбек — бұл жай ғана табыс табу құралы емес, бұл — тұлға ретінде қалыптасудың, өзіңді танудың және елге пайда әкелудің ең биік мінбері. Жаңа буынның осы серпінді көзқарасы Шымкентті жасампаздық пен еңбекқорлықтың шынайы орталығына айналдырары сөзсіз.