ШЫМКЕНТТЕ ЖАЯУ ЖҮРГІНШІЛЕРДІҢ ҚАУІПСІЗДІГІНЕ БАҒЫТТАЛҒАН ПРОФИЛАКТИКАЛЫҚ ШАРА ӨТКІЗІЛДІ
Шымкент қалалық Патрульдік полиция полкі мен «Жастар ресурстық орталығы» бірлесіп, «Жаяу жүргінші» жедел-профилактикалық іс-шарасы аясында қала тұрғындарына бағытталған кешенді түсіндіру жұмыстарын жүргізді. Бұл іс-шараның басты мақсаты – жаяу жүргіншілердің жолдағы қауіпсіздігін қамтамасыз ету және жол қозғалысына қатысушылардың құқықтық сауаттылығын арттыру болып табылады. Іс-шара барысында патрульдік полиция қызметкерлері мен жастар ұйымының өкілдері жол қозғалысына қатысушыларға жаяу жүргіншілердің жолдағы қауіпсіздігін сақтау бойынша түсіндірме жұмыстарын жүргізіп, жол ережелерін сақтау маңызды екенін жеткізіп, арнайы ақпараттық жадынамалар таратты.
Аталған жадынамаларда жаяу жүргіншілердің қозғалыс ережелері, белгіленбеген жерден өтудің қаупі, сондай-ақ жүргізушілердің жаяу жүргіншілерге жол беру міндеттері қамтылған. Бұл ақпараттар тұрғындардың қауіпсіздігін арттырып, жол-көлік оқиғаларының алдын алуға бағытталған. Шараның басты мақсаты – тұрғындардың құқықтық сауаттылығын арттырып, жол-көлік оқиғаларының алдын алу.
Патрульдік полиция полк командирінің міндетін уақытша атқарушы, полиция подполковнигі Аширбаев Тоқтарбек сөз сөйлеп, жол қозғалысына қатысушыларды тәртіп пен қауіпсіздік ережелерін қатаң сақтауға шақырды. Ол адамдардың өмірі мен денсаулығын қорғау мақсатында мұндай шаралардың маңызды екендігін атап өтті.
– Жол қозғалысы ережелерін сақтау – әрбір азаматтың азаматтық борышы. Біздің негізгі мақсатымыз – жол-көлік оқиғаларының алдын алу арқылы адам өмірі мен денсаулығын сақтау. Мұндай түсіндіру шаралары алдағы уақытта да жалғасын табады, – деді Аширбаев Тоқтарбек.
Айта кету керек, полиция мен қоғамның өзара іс-қимылы – жолдағы қауіпсіздікті қамтамасыз етудің негізгі тетіктерінің бірі. Қоғамдық түсіндіру жұмыстары мен бірлескен іс-шаралар тұрғындар арасында қауіпсіздік мәдениетін қалыптастыруға ықпал етеді.
Бұл бастама қала тұрғындарының жол ережелерін қатаң сақтап, жол-көлік оқиғаларының алдын алуға бағытталған. Жол қауіпсіздігін арттыру – тек құқық қорғау органдарының ғана емес, әрбір азаматтың жауапкершілігі. Осылайша, Шымкенттегі қоғамдық қауіпсіздікті қамтамасыз ету үшін бірлескен шаралар әрі қарай да жалғасып, қаладағы қауіпсіздік деңгейін одан әрі көтеруге мүмкіндік береді.
Comments