«AMANAT» партиясының «Кітап–AMANAT» партиялық жобасы аясында партияның Шымкент қалалық филиалы жанындағы «Мирас» қоғамдық кеңесінің мүшелері қаламгерлер қауымымен кездесу өткізді. Бұл шара қазақ әдебиетінің дамуына және жазушылардың шығармашылық әлеуетін арттыруға бағытталған маңызды қадам ретінде бағаланды.
Іс-шараға «AMANAT» партиясы Шымкент қалалық филиалы атқарушы хатшысының орынбасары Ербол Байқонысов, белгілі жазушылар Момбек Әбдәкімұлы, Захардин Қыстаубаев, Құлбек Ергөбек, сондай-ақ Қазақстанның еңбек сіңірген қайраткері, заң ғылымдарының докторы, профессор Бекет Тұрғараев, «Жастар рухы» жастар қанатының белсенділері мен бірқатар оқырман қатысты. Кездесу барысында жазушылар өз шығармашылығы мен әдебиеттегі жетістіктері туралы қысқаша сөз қозғап, қоғамның мәдени саласын дамытудағы өз көзқарастарын білдірді.
Кездесу барысында қаламгерлер қазақ әдебиетін қолдау, жазушылардың мәртебесін көтеру, шығармашылыққа жағдай жасау сияқты маңызды тақырыптарды көтеріп, өзекті ұсыныстарын ортаға салды. Бұл шарада әдебиеттің өзекті мәселелері ғана емес, сондай-ақ қазіргі заманғы әдебиетке деген жастардың қызығушылығын арттыру жолдары да талқыланды.
Захардин Қыстаубаев қазіргі таңда жазушыларға мемлекет тарапынан лайықты деңгейде қолдау көрсетілмей отырғанын айтып, «Жазушылар күнін» белгілеу мен оны ресми түрде атап өту қажеттігін ұсынды. Оның айтуынша, мұндай күннің белгіленуі қаламгерлердің еңбегіне деген қоғамның құрметін арттырып, жазушылардың мәртебесін көтеруге көмектеседі.
Момбек Әбдәкімұлы бұл бастаманы қолдайтынын жеткізіп, Шымкенттегі Абай саябағында «Жазушылар аллеясын» салу идеясын ортаға салды. Аллея жазушылардың шығармашылық мұрасына арнап ашылған орын болар еді, онда қаламгерлердің шығармаларының үзінділері қойылып, халықтың назарын әдебиетке аударуға септігін тигізер еді. Сонымен қатар, шығармашылықпен айналысатын тұлғаларға бағытталған материалдық және рухани қолдау тетіктерін арттыру мәселесі де айтылды. Бұл шаралар жазушыларға шығармашылық еркіндік беріп, қоғамда әдебиетке деген қызығушылықты арттырар еді.
Кездесу соңында қатысушылар қазақ әдебиетін дамыту жолында осындай ашық диалогтардың маңызы зор екенін атап өтіп, «Кітап–AMANAT» жобасының қоғамдағы рөліне жоғары баға берді. Жазушылар өз пікірлерін еркін білдіре алатын алаңның ашылуы, сондай-ақ бұл жобаның барлық деңгейде жүзеге асуы әдебиет саласын жаңа белестерге көтеретініне сенімді. Сонымен қатар, партия өкілдері мен қаламгерлер бірлесіп әдебиет саласын дамытудың жолдары туралы өзара түсіністік пен серіктестікті нығайтуға ниетті екенін білдірді.
Comments