Қазығұрт ауданының басшысы Азизхан Исмайылов өңірде атқарылып жатқан жұмыстарды тексеру мақсатында іс-сапармен Сарапхана ауылдық округіне барды. Өңір әкімі аталған ауылда орналасқан жеке кәсіпкер Мықтыбек Меңлібековтың 1 гектар жерді қамтитын балық өсіру шаруашылығымен танысты. Мұнда майшабақ, сазан, алабұға, бекіре, жайын, табан, жалпақ, тұқы, шортан және көксерке сияқты балық түрлері өсірілуде. Жобаның жалпы құны — 10 млн теңге. Қазіргі таңда мұнда 1 адам жұмыс істейді. Жылдық өндіріс қуаттылығы — 1 тонна.
Сапар аясында аудан әкімі Қарабау ауыл округіндегі 3 гектар аумақта орналасқан, жалпы құны 50 млн теңге болатын “Ақсылбат-Құс” ЖШС балық өсіру жобасының жұмысымен де танысты. Болашақта бұл шаруашылық қосымша 5 гектар аумақты игеру жоспарлап отыр. Кәсіпорын жылына 100 тоннаға дейін балық өсіруді жоспарлауда.
Сонымен қатар, өңір басшысы Қызылқия ауыл округіндегі ең ірі жобалардың бірі — “KAZYQURT BALYQ” ЖШС-нің жұмыс барысымен де танысты. Жалпы құны 250 млн теңге болатын бұл жоба толық іске қосылғанда 15 адам тұрақты жұмыспен қамтылады. Өндіріс орнының жылдық қуаттылығы — 1000 тонна балық өндіруге қауқарлы. Сондай-ақ, балық өнімдерін қайта өңдеу бағыты да қолға алынбақ. Қазіргі таңда инфрақұрылымдық жұмыстар жүргізіліп, сазан балығының шабақтарын алу бойынша келіссөздер жүргізілуде.
Comments