Тұрғындар қаржылық сауатын арттыруда

Түркістан облысының Сауран ауданына қарасты Қарашық ауылы округінің тұрғындарына қаржылық сауаттылықты арттыру мақ­сатында «Қарызсыз қоғам» оқу семинары өтті. Пилоттық жоба аясындағы өткен оқыту семинарына 70-ке жуық ауыл тұрғыны қатысты.

Қаржы сарапшысы Жандос Әзімбай курсқа қатысушыларға қаражатты қалай жұмсау керектігі жайында толық ақпарат берді. Өз қаражатын тиімді басқаруды үйрену, қаржыға қатысты мәсе­лелер қалай пайда болатынын және алаяқтық әрекеттерді қалай анықтау қажеттігі үйретілді.

Оларға ел экономикасын арттыруда халықтың атқарар рөлі маңызды екені, сондықтан өсіп келе жатқан жас ұрпақтың қар­жылық сауаттылығын арттыру аса қажеттілік тудырып отырғаны түсіндірілді. Мамандар семинарға қатысушыларға қаржыны игеру, аса қажеттілік болмаса несиеге ұрына бермеу жайында  жан-жақты дәйекті деректермен, мысалдармен жеткізді.

«AMANAT» партиясы Түр­кістан облыстық филиалының төрағасы, облыстық мәслихат депутаты Алтынсары Үмбеталиев қаржылық сауаттылық сабақта­рынан білімін арттырған ауыл тұрғындарына сертификат табыс етті.

«Бүгінде 6,3 миллионға жуық қазақстандықтың банктік не­сиелері өтелмеген. Сонымен қа­тар 1,2 миллион қазақстандық микроқаржы ұйымдарынан несие алған. Бұл азаматтардың әлеуметтік әл-ауқатына әсер етеді. Қолжетімді несиелер, қар­жы ұйымдарының жоғары па­йыз­дық мөлшерлемелері, ең бас­тысы, қаржылық сауаттылық­тың төмендігі – жыл сайын ха­лық­тың қарызының өсуін арт­тырады. Тұрғындардың  қарыз ауыртпалық мәселесі жүйелі шешімді қажет етеді. Қазіргі уақытта 1 миллионнан астам адам кем дегенде бір несиесін ке­шіктіріп отыр. Сол себепті қар­жылық сауаттылық бойынша алған білімдеріңіз өздеріңізге тиімді қызмет етсін», – деді Алтынсары Дүйсенбекұлы.

Сонымен қатар Түркістан облыстық мәслихатының депу­таты, Шорнақ бастауыш партия ұйымының төрағасы Баймахан Сүлейменов  білімін жетілдірген тұрғындарға алдағы уақытта та ұрпаққа үлгі болар­лықтай сауат арттыруды  жалғас­тырып, қарызсыз қоғамды қа­лып­тастыру барысында айнала­сы­на үлгі болып, білгенін өзге­лер­мен бө­лісіп жүру қажеттігін атап өтті.

Қараша айына дейін жалға­сатын осынау жобаға кез келген тұрғын қатыса алады. «Қарызсыз қоғам»  оқу семинарына қатыс­қысы келетіндер тұрғылықты жер­де орналасқан «AMANAT» пар­тиясының аудандық филиа­лы­на хабарласып, тіркелуі қажет.