«Фолиант» баспасы мамыр айында алғаш рет қазақ тілінде жарық көрген және қайта басылып шыққан жаңа кітаптар тізімін ұсынды.
Жақында баспадан іргелі жазушы, халқымыздың асыл перзенті Ілияс Есенберлиннің танымал «Көшпенділер» трилогиясының үш томы, Бердібек Соқпақбаевтың «Менің атым Қожа» хикаяты, Александр Беляевтің «Адам-балық» романы, балалар жазушысы Николай Носовтың «Дымбілместің Айға саяхаты», «Дымбілмес Күн қаласында», «Дымбілмес пен достарының хикаялары» атты ертегі-романдары, 1983 жылдың әдебиет саласы бойынша Нобель сыйлығының иегері, ағылшын жазушысы Уильям Голдингтің «Шыбындар әміршісі» бірегей туындысы қайта басылып шықты.
Сондай-ақ Миясе Сертбаруттың «Сыр жасырған тұман», Нобель сыйлығының иегері, ауған-американ жазушысы Халед Хоссейнидің «Батпырауық қуған бала» романы, Гүзел Яхинаның атышулы «Зүлейханың оянуы» шығармасы алғаш рет қазақ оқырманына жол тартып отыр.
Баспа өкілі Диана Исабекованың айтуынша, қайта басылып отырған кітаптардың да, алғаш рет қазақ тілінде жарық көрген туындылардың да әдебиетте алар өзіндік орны, қайталанбас сюжеті бар.
«Әсіресе, алғаш рет қазақ тілінде жарық көрген туындыларды басып шығару барысында көптеген жұмыстар атқарылды. Авторлардың өкілдерімен байланысу, авторлық құқық мәселелері, аудармашылармен ұзаққа созылған жұмыс өз нәтижесін берді. Танымал жазушысы Халед Хоссейнидің «Батпырауық қуған бала» романының, Гүзел Яхинаның атышулы «Зүлейханың оянуы» шығармасының жарық көруі біз үшін маңызды оқиға болды. Бұл бірегей туындылар қазақ оқырманының да көңілінен шығады деп сенеміз», — дейді Диана Исабекова.
1957 жылы жазылып, қазақ балалар әдебиетінің озық туындыларының біріне айналған Бердібек Соқпақбаевтың «Менің атым Қожа» хикаясы орыс, украин, француз, литва, латыш, өзбек тілдеріне аударылған. 1963 жылы «Қазахфильм» киностудиясы осы кітап бойынша кинофильм түсіргені белгілі. Баспадан қайта басылып шыққан кітап мұқабасында осы фильмдегі Қожа бейнеленді.
Америкада тұратын ауған жазушысы Халед Хоссейниді жазушы ретінде әлемге танытқан «Батпырауық қуған бала» романы 2003 жылы жарық көрген болатын. 2005 жылы «Батпырауық қуған бала» АҚШ-тың бестселлер кітаптары арасында үшінші орынға шықты. 2009 жылы «The Millions» журналы мыңжылдықтың үздік кітаптарын жариялады. Роман оқырман дауысы бойынша 20 үздік кітап тізіміне енді. Бұл кітапта көп ел үшін беймәлім тақырып – Ауғанстанда өмір сүретін адамдардың тағдыры мен олардың ішкі жан дүниесі, тебіренісі шебер суреттеледі. Кітапта шынайылық басым, әсіре жоқ.
Ал жазушы Уильям Джеральд Голдингтің өзіндік стилі, сөз саптауы ешкімге ұқсамайды, әлемге деген көзқарасы да ерекше. Голдингтің «Шыбындар әміршісін» шетелдік әдебиет әлемінің нағыз жауһары, асқаралы биігі дер едік. Ол үшін 1983 жылы жазушы Нобель сыйлығын алды. Бұл туынды – Стивен Кингтің сүйікті шығармаларының бірі. Ол бұрын-соңды оқыған кітаптарының ішіндегі інжу-маржаны «Шыбындар әміршісі» дейді. Уильям Голдингтің «Шыбындар әміршісі» шығармасы 1954 жылы жарық көрді. Жасөспірім балалар әуе апатына ұшырап, тіршіліктен тыс қалған аралға тап болады. Балалар алғашында үлкендерше тәртіп орнатып, өз бетінше өмір сүрмек болды, алайда бұл тәртіп ұзаққа бармайды. Балалардың арасында билік үшін күрес басталады. Осы шығармасы туралы жазушы: «Шыбындар әміршісін» мен соғыстан кейін жазуым тиіс болды, қасіретті соғысты басынан кешкен адам қатыгездіктен жерінер еді, дегенмен шығарманың негізгі түйіні де сол», — деп жазады.
«Time» журналының нұсқасы бойынша ағылшынның ең үздік 100 романы тізіміне енген «Жоғалтып алма сен мені» романы – жапондық-ағылшын жазушысы Кадзуо Исигуроның туындысы. Қазақ тіліне аударған – Қазақстан Жазушылар одағының мүшесі, жазушы Өмірзақ Мұқай.
Туындыға арқау болған бұзылмас достық, кеш келген махаббат жалпы қалыптасқан үлгіде емес, басқаша формада көрсетілген.
2010 жылы роман желісімен фильм де түсірілген. Режиссёрі – американдық Марк Романек.
«Исигуро – сезімталдық пен қатыгездік, ауырсыну мен рахаттану сезімін шебер бейнелейтін суреткер», – дейді сыншылар. Әлемге өзгеше көзқараспен қарайтын жазушы қаламынан туған антиутопия шынайы өмірді сатиралық, пародиялық тұрғыдан бейнелейді.
Естеріңізге салсақ, 14 сәуір күні «Фолиант» баспасында Қазақстанның халық жазушысы, Мемлекеттік сыйлықтың лауреаты Әзілхан Нұршайықовтың қайта басылып шыққан «Махаббат, қызық мол жылдар» романының тұсаукесері өткен болатын.
Қазақ оқырмандарын әлем әдебиетінің бестселлер кітаптарымен таныстыруды мақсат еткен «Фолиант» баспасы биыл Рэй Бредберидің «Фаренгейт бойынша 451 градус», Джон Рональд Руэл Толкиннің «Сақиналар әміршісі», Стивен Кингтің «Сол», «Жасыл миль», «Рита Хейворт және Шоушенктен қашу», Кен Кизидің «Жындылар үйіндегі жанжал», Луиза Мэй Олкотттың «Кішкентай ханымдар», Шарлотта Бронтенің «Джейн Эйр», Джо Диспензаның «Түпсана күші», Герберт Уэллстің «Көрінбейтін адам», Ахмет Үміттің «Ыстамбұл естеліктері», Джон Стейнбектің «Тышқан мен адам хақында», «Інжу-маржан», Клайв Стейплз Льюистің «Арыстан, сиқыршы және киім шкаф», Роберто Риччидің «Қызыл Арлекин», Дэн Браунның «Да Винчи коды», Николай Лугиновтың «Шыңғыс ханның әмірімен» туындыларын жарыққа шығаруды жоспарлап отыр.
Comments