Шымкент қаласының Әл-Фараби ауданында жолдарды жөндеу, көшелерді жарықтандыру, аяқжолдар мен ирригациялық жүйелерді дамыту бағытында жұмыстар атқарылуда. Бүгінде аудан тұрғындары ауыз су, электр жарығы және табиғи газбен толық қамтылған.
Өткен жылы тиісті басқарма тарапынан 113 көшеге асфальт төселіп, жол жабыны жаңартылды. Биыл 50 көшеде жөндеу жүргізу жоспарланып, оның 45-і толық аяқталды. Сонымен қатар, былтыр 182 көпқабатты тұрғын үйдің ауласына 2 600 тонна асфальт төселді. Биыл шамамен 100 мекенжайдағы аулаішілік жолдарға 2 000 тонна асфальт төсеу көзделіп, 87 ауладағы ойылған жерлер қалпына келтірілді.
Жаяу жүргіншілерге қолайлы жағдай жасау мақсатында да жұмыстар жүргізілуде. Ауданда жалпы ұзындығы 137,3 шақырым болатын 122 көшеде аяқжол бар. 2025 жылы 19 көшеде 12 шақырым аяқжол салынса, биыл 32 көшені жаңарту жоспары аясында 17 көшедегі жұмыстар аяқталды.
Көшелерді жарықтандыру бағытында былтыр 175 көше қамтылды. Биыл 58 тұйық көшеге жарықшам орнату жоспарланып, 8 көшеде жұмыс аяқталды. Сонымен бірге ауданның коммуналдық мекемесі 136 аула мен көшені жарықтандыруды қолға алып, бүгінге дейін 101 орында 148 жарықтандыру бағанасы мен кронштейн орнатты.
Жауын-шашын кезінде су өткізу жүйесін жақсарту үшін ирригациялық арықтар салынуда. Былтыр 17 көшеге арық жүйесі орнатылды. Биыл басқарма тарапынан жоспарланған 25 көшенің 20-сында жұмыс толық аяқталды. Бұған қоса, ауданның коммуналдық мекемесі 32 мекенжайда арық жүйесін орнатуды жоспарлап, 17 көшедегі жұмысты аяқтады.
Тұрғын үйлерді жылумен қамту мәселесі де бақылауда. Аудандағы 931 көппәтерлі үйдің 860-ы орталықтандырылған жылу жүйесіне қосылған, қалған 71-і автономды жүйені пайдаланады. 2026–2027 жылғы жылыту маусымына дайындық аясында орталықтандырылған жүйеге қосылған 860 үйде сығымдау жұмыстары толық жүргізіліп, жылу берілді.
Санитарлық тазалықты қамтамасыз ету үшін аудан 7 секторға бөлінген. Бұл бағыттағы жұмыстарға 121 арнайы техника мен 558 қызметкер жұмылдырылған. Көпқабатты үйлердің аулалары мен ішкі орам көшелері аптасына екі рет тазаланады.
«Таза Қазақстан» акциясы аясында биыл 25 сенбілік ұйымдастырылып, оған 30 мыңға жуық тұрғын мен 230 техника қатысты. Нәтижесінде 540 тонна қоқыс шығарылды.
Сонымен қатар, аудандағы базарларды жаңғырту жұмыстары жалғасуда. «Орталық Қырғы» базарындағы жұмыстар 95 пайызға аяқталып, соңғы кезеңі жүргізілуде. «Назым апа» базарында жаңғырту толық аяқталды.
Жалпы, атқарылып жатқан жұмыстар ауданның инфрақұрылымын жақсартуға, қоғамдық кеңістіктерді дамытуға және тұрғындарға қолайлы өмір сүру ортасын қалыптастыруға бағытталған.
Comments