БӘЙДІБЕК: АУДАН ТҰРҒЫНДАРЫНЫҢ ҚАУІПСІЗДІГІ – БАСТЫ НАЗАРДА

Түркістан облысының әкімі Нұралхан Көшеровтің тапсырмасына сәйкес Бәйдібек ауданында тұрғындардың өмірі мен денсаулығын қорғау, өрт қауіпсіздігін қамтамасыз ету, сондай-ақ улы газдан улану жағдайларының алдын алу бағытындағы жұмыстар күшейтілді. Аталған шаралар аудан аумағында қауіпсіздік мәдениетін қалыптастыруға және төтенше жағдайлардың алдын алуға бағытталған.
Осы тапсырманы нақты жүзеге асыру мақсатында аудан әкімінің міндетін атқарушы Нұрпеис Ақбаевтың төрағалығымен арнайы жұмысшы топ құрылды. Жұмысшы топ құрамына аудандық төтенше жағдайлар бөлімінің қызметкерлері, тиісті сала мамандары және жауапты мекеме өкілдері енгізілді. Олар Жамбыл ауылдық округіне арнайы барып, тұрғын үйлерді аралау арқылы қауіпсіздік талаптарының сақталу деңгейін зерделеді.
Аралау барысында тұрғын үйлердегі жылыту пештерінің, газ қондырғыларының және электр желілерінің жағдайына ерекше назар аударылды. Сонымен қатар, өрт қауіпсіздігі талаптарының орындалуы, түтін шығару жүйелерінің дұрыс жұмыс істеуі және тұрғындардың қауіпсіздік ережелерін сақтау деңгейі тексерілді. Мамандар тұрғындарға улы газдан уланудың алдын алу жолдары, өрт шыққан жағдайда атқарылатын іс-қимылдар туралы жан-жақты түсіндіру жұмыстарын жүргізді.
Аудан басшылығы тарапынан халықтың қауіпсіздігін арттыруға бағытталған мұндай рейдтік және түсіндіру шаралары алдағы уақытта барлық ауылдық округтерде жүйелі түрде жалғасын табатын болады. Бұл өз кезегінде тұрғындардың қауіпсіздігін қамтамасыз етіп қана қоймай, төтенше жағдайлардың алдын алуға мүмкіндік береді.
Жұмысшы топ алдағы кезеңде тұрғын үйлермен қатар, кәсіпкерлік нысандарды және әлеуметтік мекемелерді де қамтитын болады. Атап айтқанда, мектептер, балабақшалар, мәдениет үйлері мен басқа да қоғамдық орындарда қауіпсіздік талаптарының сақталуына бақылау жүргізіледі. Сонымен бірге, түсіндіру және үгіт-насихат жұмыстары арқылы тұрғындардың жеке жауапкершілігін арттыру көзделіп отыр.
Аталған жұмыстар аудан аумағында қауіпсіз әрі тұрақты өмір сүру ортасын қалыптастыруға, тұрғындардың өмірі мен денсаулығын қорғауға бағытталған маңызды қадамдардың бірі болып табылады. Алдағы уақытта да бұл бағыттағы жұмыстар тиісті деңгейде жалғасын тауып, тұрғындардың қауіпсіздігі басты назарда болмақ.