Шымкент қаласына жұмыс сапары барысында Қазақстан Республикасының Төтенше жағдайлар министрі Шыңғыс Әрінов күрделі жөндеуден өткен №1 мамандандырылған өрт сөндіру бөліміне барды.
Бөлім 2015 жылдан бері осы ғимаратта орналасқан. Күрделі жөндеуден кейін мұнда заманауи инфрақұрылым қалыптастырылып, жеке құрамның қызметін сапалы атқаруына қолайлы жағдай жасалды.
№1 мамандандырылған өрт сөндіру бөлімі Абай және Қаратау аудандарының тұрғындарының қауіпсіздігін қамтамасыз етеді. Қазіргі уақытта бөлімде 116 өрт сөндіруші-құтқарушы қызмет атқарады.
2025 жылдың маусымында басталған күрделі жөндеу жұмыстары төрт қабатты ғимаратты толық қамтыды: оқу сыныптары, жуыну бөлмелері, асхана, демалыс бөлмелері мен қызметтік кабинеттерде ішкі әрлеу жұмыстары жүргізілді. Инженерлік желілер толығымен ауыстырылып, ғимараттың сыртқы әрлеуі де жаңартылды.
Бөлім заманауи техникамен – автоцистерналармен және автосатымен жабдықталды. Жеке құрамның дене дайындығын арттыру мақсатында жаңа workout-аймақ құрылды.
Шыңғыс Әрінов өрт сөндіру бөлімдерін жаңарту – құтқарушылардың қызмет жағдайын жақсарту ғана емес, халықтың қауіпсіздігін арттыруға бағытталған маңызды қадам екенін атап өтті.
Comments