Шымкент қаласы соңғы жылдары еліміздегі маңызды мегаполистердің біріне айналып, экономикалық тұрғыда қарқынды дамып келеді. Мемлекет басшысының тапсырмаларын орындау мақсатында қалада әлеуметтік-экономикалық ахуалдың жақсаруы айқын байқалады. Әсіресе, 2024 жылдың алғашқы 10 айында қала экономикасы 12 пайызға өсуін көрсетіп, бұл көрсеткіш республикадағы ең үздік нәтижелердің бірі болып отыр. Бұл өсімнің артында инвестиция тарту мен жаңа жұмыс орындарының ашылуы сынды көптеген факторлар тұр.
Қала әкімдігі аппаратының мәжілісінде осы жылғы әлеуметтік-экономикалық даму қорытындылары мен 2025 жылға дейінгі жоспарлар талқыланды. Шымкент қаласының әкімі Ғабит Сыздықбековтің жетекшілігімен өткен жиында әлеуметтік мәселелермен қатар, экономиканың түрлі салаларындағы көрсеткіштерді жақсарту мақсатындағы шаралар қаралды. Экономика және бюджеттік жоспарлау басқармасының басшысы Ерлан Есқараевтың айтуынша, қалада қысқа мерзімді экономикалық өсім 14,8 пайызды құраған. Бұл көрсеткіштердің арасында сауда саласындағы (+24,6%), өндіріс саласындағы (+14,57%) және құрылыс саласындағы (+7%) өсім айтарлықтай байқалады. Сонымен қатар, инвестиция көлемінің артуы мен тұрғын үйлердің пайдалануға берілуі де маңызды жетістіктердің бірі болып табылады. Мәселен, тұрғын үйлердің құрылыс көрсеткіштері 0,4 пайызға артқан.
Жалпы алғанда, қаланың әлеуметтік-экономикалық дамуында тұрақтылық сақталуда, ал жыл қорытындысы бойынша көрсеткіштерді одан әрі жақсарту жоспарлануда. Бұл салада денсаулық сақтау, білім беру, құрылыс және өндіріс сынды маңызды бағыттар бар. Қала аумағында амбулаториялық медициналық көмекті 59 мекеме ұсынады, оның ішінде 14 мемлекеттік және 45 жеке меншік емхана бар. Жергілікті медициналық ұйымдарда 1,276 миллион адам тіркелген, олардың 1 миллионнан астамы міндетті әлеуметтік медициналық сақтандыру (МӘМС) жүйесіне енген. Қала әкімдігінің мәліметі бойынша, МӘМС жүйесіне қатысушылардың саны артқанымен, медициналық қызметтер бойынша қаржылық мәселелер жоқ. Барлық медициналық ұйымдарға қаржы уақытында аударылып, берешектер жойылған.
2024 жылы үшінші мегаполис өзінің әлеуметтік-экономикалық даму қарқынын одан әрі жалғастыруда. Биыл қала аумағында жалпы көлемі 438 гектарды құрайтын екі жаңа индустриалды аймақ іске қосылған. Осыған сәйкес, экономикадағы өсім 12 пайызға жеткен. Атап айтқанда, инвестиция көлемі 9 пайызға, құрылыс жұмыстарының көлемі 27 пайызға, тұрғын үйлер алаңы 42 пайызға өскен. Сонымен қатар, сауда көлемі мен көлік қызметінің көрсеткіштері де елеулі артқан. Мегаполистің әлеуметтік жағдайын жақсарту мақсатында жұмыссыздықты азайту жұмыстары да нәтижелі жүргізілуде. Биыл 45 мыңнан астам адам жұмыспен қамтылып, оның ішінде 32 мыңға жуығы тұрақты жұмыс орындарына орналастырылған.
Қала дамуының негізгі көрсеткіштері мен жоспарлары айтарлықтай оң нәтижелер көрсетіп отыр. Шымкенттің әлеуметтік-экономикалық дамуы қарқынды түрде жалғасып, алдағы жылдары да осы бағыттағы өсімнің сақталатынына күмән жоқ.
Comments