Шымкент қаласының әкімі Ғабит Сыздықбеков қаладағы бірқатар құрылыс және әлеуметтік нысандардың жай-күйімен танысты. Атап айтқанда, ол «Тұран» және «Бозарық» шағынаудандарында салынып жатқан көпқабатты тұрғын үйлердің құрылыс барысы мен абаттандыру жұмыстарына ерекше назар аударды. Қала басшысы тұрғын үйлердің қала тұрғындарын баспанамен қамтамасыз етуге, жайлы өмір сүруге және заманауи қолайлы ортаны қалыптастыруға бағытталғанын атап өтті.
Мердігер ұйымға құрылыс жұмыстарын сапалы орындау және нысандарды белгіленген мерзімде аяқтау міндеті жүктелді. Сондай-ақ аулаларды көгалдандыру, сапалы абаттандыру, балалар мен спорт алаңшаларын орнату және автотұрақ аймақтарын ұйымдастыру мәселелеріне ерекше көңіл бөлінді. Сонымен қатар, Ғабит Сыздықбеков Абай ауданында мүмкіндігі шектеулі жандарға арналған 150 орындық оңалту орталығының құрылысымен танысты. Бұл орталық ашылғаннан кейін ерекше жандарды жан-жақты қолдауға бағытталған маңызды әлеуметтік нысанға айналады. Мұнда олардың оңалуы мен қоғамға бейімделуіне кешенді жағдай жасалады.
Қала әкімдігі сондай-ақ «Тұран» ауданында 200 орындық «Ортолайн» оңалту орталығының құрылысын тексерді. Нысан келесі жылдың басында пайдалануға беріліп, жүйке жүйесі, нейрохирургия, ортопедия және травматология салаларында ересектерге кешенді емдеу және оңалту қызметтерін көрсетуге мүмкіндік береді.
Ғабит Сыздықбеков Ш. Қалдаяқов көшесінде орналасқан көпқабатты тұрғын үйлердің қасбетін жаңарту жұмысын бақылап, аудан әкімдігіне барлық кезеңдерде сапаны қатаң қадағалауды тапсырды. Сонымен қатар, қала басшысы «Металлург» спорт кешеніне барып, нысанның қазіргі жағдайын тексерді. Кешеннің жылыту маусымына дайындығы қарастырылып, спортшылар мен келушілер үшін қолайлы жағдай жасау қажеттігі аталды. Жауапты мамандарға қысқы кезеңде кешеннің толыққанды жұмыс істеуін қамтамасыз ету және анықталған кемшіліктерді дер кезінде жою тапсырылды.
Comments