Қазіргі уақытта отбасындағы зорлық-зомбылық мәселесі – қоғамда аса өзекті әрі құқықтық тұрғыда шешуді қажет ететін тақырыптардың бірі болып табылады. Өкінішке орай, бұл мәселе әлі күнге дейін көптеген отбасыларда орын алып, адамдардың өміріне теріс әсерін тигізуде. Қоғамда орын алып жатқан түрлі жайттар мен келеңсіз оқиғалар адамдардың ой-санасын алаңдатып, бұл мәселенің өзектілігін арттырып отыр. Отбасы — бұл қоғамның ең маңызды бөлімі және сол арқылы болашақ ұрпақтың тәрбиесі мен қалыптасуы жүзеге асады. Ал егер отбасында зорлық-зомбылық орын алса, бұл тек сол отбасына ғана емес, бүкіл қоғамға зиянын тигізеді.
Отбасындағы зорлық-зомбылық құрбандарының көпшілігі моральдық тұрғыда қорқып, өздерінің басынан өткен қиындықтар туралы ашық айтуға ұялады. Бұл, әсіресе, әйелдер мен қыздар арасында жиі кездесетін мәселе. Көп жағдайда олар құқық қорғау органдарына шағымданудан бас тартып, зорлық-зомбылықты жалғыз өзі шыдап өткізуді жөн көреді. Өкінішке орай, мұндай әрекеттер олардың психологиялық және физикалық денсаулығына айтарлықтай зиян тигізеді. Қоғамда мұндай жағдайларды болдырмау үшін, әрбір азамат зорлық-зомбылыққа қарсы ұстанымын білдіріп, бұл мәселені талқылауға қатысуы қажет.
Осыған байланысты, Қазығұрт аудандық полиция бөлімінің қызметкерлері әйелдер мен қыздар арасында зорлық-зомбылықтың алдын алу және оның зиянын түсіндіру бағытында белсенді жұмыстар жүргізуде. Әйелдердің құқықтық сауаттылығын арттыру, зорлық-зомбылықтың түрлері мен себептерін зерделеу, сондай-ақ бұл мәселе бойынша құқықтық көмек алу жолдарын түсіндіру – негізгі мақсаттардың бірі. Сонымен қатар, алдағы уақытта қылмыстық әрекеттерді болдырмау және зорлық-зомбылықты қоғамнан түбегейлі жою мақсатында тиісті профилактикалық шаралар қабылданып, әрбір әйел мен қыздың құқықтары қорғалатыны түсіндірілуде.
Қоғамда зорлық-зомбылыққа жол бермеу, әр адамды оның құқықтары мен бостандығына құрметпен қарау – бұл баршамыздың ортақ міндетіміз. Сондықтан да, әрбір азамат зорлық-зомбылыққа қарсы күреске атсалысып, осы мәселені шешуге өз үлесін қосуы керек.
Comments