Шымкент қаласының Төтенше жағдайлар департаменті жаз мезгіліндегі қауіпсіздік шаралары туралы арнайы мәлімет жариялап, тұрғындарды сақтыққа шақырды. Жазғы маусымда судағы қауіпсіздік, балалардың көпқабатты үйлердің терезесінен құлау жағдайлары және өрт қауіпсіздігі мәселелері бойынша атқарылып жатқан шаралар толықтай түсіндірілді.
Қазіргі таңда республика бойынша шомылу маусымы басталғалы бері 85-ке жуық адам суға батып, қайғылы оқиғалар орын алған. Бұл жағдайлар арасында балалар да бар, сондықтан қауіпсіздік шараларын күшейту өте маңызды. Шымкент қаласында суға шомылуға рұқсат етілген үш ресми орын бар: Тоғыс су қоймасындағы «Холодильник» демалыс орны, Бадам су қоймасындағы «Рахат Бадам», және Қошқар ата өзенінің бастауы. Бұл орындарда суға түсуге толық мүмкіндік берілген, ал 13 жерде суға түсуге тыйым салынған. Осы тыйым салынған жерлерге 200-ге жуық ескерту тақтайшалары орнатылып, тұрғындар мен демалушылардың қауіпсіздігі қамтамасыз етілуде.
Жазатайым оқиғалардың алдын алу мақсатында күнделікті патрульдік рейдтер ұйымдастырылып келеді. Биылғы жылдың басынан бері 180 рейд өткізіліп, 15 250 адам қамтылған. Бұл рейдтер барысында қауіпсіздік талаптарын бұзған азаматтарға ескерту жасалып, түсіндіру жұмыстары жүргізіледі.
Айта кетейік, 2025 жылы судағы жазатайым оқиғалар әзірге тіркелмеген. Ал 2024 жылы екі жағдай орын алып, оның бірінде бала зардап шеккен. Қауіпсіздік ережелерін бұзған 4 азаматқа ҚР Әкімшілік құқық бұзушылық туралы кодексінің 412-бабына сәйкес, 55 000 теңгеден айыппұл салынған.
Төтенше жағдайлар департаменті судағы қауіпсіздік шараларының сақталуына ерекше назар аударуды сұрайды. Сонымен қатар, жаз айларында өрт қауіпсіздігі мәселесіне де мән берілуі қажет. Шымкент қаласының Төтенше жағдайлар департаменті тұрғындарды өз үйлерінде және қоғамдық орындарда өрт қауіпсіздігін сақтау шараларын қатаң орындауға шақырады.
Comments