Шымкент қаласында жаз мезгілінде тағамнан улану оқиғаларының алдын алу мақсатында эпидемиологиялық маңызы бар нысандарға — қоғамдық тамақтану орындарына, азық-түлік өнімдерін өндіретін, сақтайтын және сататын кәсіпорындарға санитариялық талаптардың сақталуына ерекше назар аударылуда. Бұл талаптар ҚР Денсаулық сақтау министрлігінің санитариялық қағидаларымен бекітілген.
Аталған нысандарда ауыз су мен кәріз жүйесінің болуы, желдету мен жарықтандырудың жеткіліктілігі, қалдықтарды жинау мен жоюға арналған алаңдардың болуы, санитариялық киім және құрал-жабдықтармен қамтылуы, тағам өнімдерінің ілеспе құжаттарының болуы, қызметкерлердің медициналық тексеруден уақтылы өтуі — негізгі шарттар қатарында.
Сонымен қатар, тағам өнімдерін дайындау барысында әртүрлі тағам түрлеріне арналған жеке бөлшектеу мүкәммалдарын пайдалану, бактерицидтік шамдармен жабдықталу, жұмысшылардың денсаулығына тұрақты бақылау жүргізу сияқты шаралар тағам қауіпсіздігін қамтамасыз етеді.
Күн ысыған сайын сұраныс артып жатқан жұмсақ балмұздақтарды өндіру мен сатуға да нақты санитариялық талаптар қойылады. Балмұздақ арнайы фризерлер арқылы дайындалып, тек жаңа қайнатылған ауыз сумен ерітілген құрғақ қоспалар қолданылады. Дайын өнім бірден ұсынылады, қоспаларды сақтауға тыйым салынады.
Шикізат ретінде пайдаланылатын жұмыртқа мен сүт міндетті түрде пастерленген болуы тиіс. Балмұздақ сату тек дайындау орнында жүзеге асырылады. Жұмысшылар медициналық кітапшамен қамтылып, санитариялық киім киюі және жеке гигиенаны сақтау талаптарын мүлтіксіз орындауы қажет.
Қаладағы мейрамхана, кафе, асхана, бар, буфет сияқты қоғамдық тамақтану орындары халық көп жиналатын нысандар ретінде санитариялық-эпидемиологиялық тұрғыдан ерекше қадағалауды қажет етеді.
Бұл нысандарда санитариялық тораптар мен қол жууға арналған орындар, желдету және жылу жүйелері, жеке киімдерге арналған бөлмелер қарастырылуы тиіс. Тағаммен тікелей жұмыс істейтін қызметкерлердің барлығы гигиеналық оқудан өтіп, денсаулығы күнделікті бақылауда болады.
Ас дайындау барысында арнайы таңбаланған жабдықтар әр өнім түріне жеке қолданылады. Бұдан бөлек, ХАССП жүйесі негізінде ішкі өндірістік бақылау жүргізіледі. Бұл әдіс қауіптерді алдын ала анықтап, тағам сапасын жүйелі түрде бақылауға мүмкіндік береді.
Comments