«AMANAT» партиясы Шымкент қалалық филиалы жанындағы Партиялық бақылау комиссиясы партияның сайлауалды бағдарламасының орындалу барысын бақылау мақсатында бірқатар білім беру мекемелерін аралап, құрылыс жұмыстарының жай-күйімен танысты.
Іс-шараға Әл-Фараби аудандық партия филиалының төрағасы Наргиза Керімбаева, қалалық партиялық бақылау комиссия мүшелері Жанзақ Алибеков, Сержан Тұрсынбеков, Нурғали Ешенқұлов, Әл-Фараби аудандық партиялық бақылау комиссиясының төрағасы Бердіқұл Садықов, атқарушы хатшысы Ердәулет Жүнісбек, мәслихат депутаты Бақытжан Позилов, Шымкент қалалық Құрылыс басқармасының өкілдері және мердігер мекемелердің мамандары қатысты. Комиссия құрамында қаладағы құрылыс саласының мамандары мен білім беру жүйесінің өкілдері болғандықтан, бұл шара білім мен құрылыс саласының бірлесе жұмыс істеуін қолдауға мүмкіндік береді.
Жұмысшы топ ең алдымен №19 Ө.Жәнібеков атындағы жалпы орта мектепке барып, онда жүріп жатқан құрылыс жұмыстарының барысын бақылады. 325 оқушыға арналған жаңа ғимараттың құрылысы 2025 жылдың қаңтар айында басталған болатын. Жоспар бойынша нысан желтоқсан айында пайдалануға берілуі тиіс болатын. Алайда тексеру барысында жұмыс кестесінен айтарлықтай кешігу байқалды. Құрылыс жұмыстарындағы бұл кідіріс, әсіресе мектептің ашылуына уақыт өте маңызды әсер етуі мүмкін, сондықтан барлық тараптар бұл мәселені шешу үшін бірігіп жұмыс істеуі тиіс. Комиссия мүшелері бұл қарқынмен құрылыстың белгіленген мерзімде аяқталмайтынын айтып, алаңдаушылық білдірді. Құрылыс басқармасының өкілдері жағдайдан хабардар екендерін, осыған байланысты мердігер мекемеге екі мәрте айыппұл салынғанын жеткізді. Дегенмен, комиссия мүшелері бұған қатысты қатаң шаралар қабылдау қажеттігін атап өтіп, алдағы уақытта арнайы жиын өткізу туралы шешім қабылдады. Бұл жиындарда мердігер мекемелердің жұмыс сапасы мен уақытылы аяқталуын қадағалау үшін нақты шаралар ұсынылатын болады.
Сондай-ақ жұмысшы топ 1983 жылы іргетасы қаланған №97 «Ақмарал» балабақшасына барып, күрделі жөндеу жұмыстарының барысымен танысты. 290 орынға лайықталған бұл мекемеде құрылыс қарқынды жүріп жатыр. Мердігер ұйым өкілдерінің айтуынша, жөндеу жұмыстары жаңа оқу жылы басталғанға дейін толық аяқталады. Комиссия мүшелері атқарылып жатқан жұмыстарға оң бағасын беріп, сонымен қатар құрылыс сапасына ерекше мән беру қажеттігін ескертті.
Comments