Бүгін Шымкент қаласы Еңбекші ауданының әкімі Д. Есілбектің төрағалығымен аудан әкімдігі аппаратының кезекті аппараттық жиналысы өтті. Жиынға аудан әкімдігі аппаратының қызметкерлері, бөлім басшылары және жауапты сала жетекшілері қатысты. Бұл туралы «muzbalaq.kz» ақпарат агенттігі хабарлайды.
Кезекті мәжіліс барысында ауданның әлеуметтік-экономикалық дамуы, инженерлік инфрақұрылымның жаңартылуы, тұрғын үй-коммуналдық шаруашылығын жақсарту, абаттандыру, көріктендіру, санитарлық тазалық жұмыстары кеңінен талқыланды. Сонымен қатар ауданда «Таза Қазақстан» тұжырымдамасы аясында атқарылып жатқан жұмыстар, экологиялық жағдайды жақсарту, жасыл аймақтарды көбейту және тұрғындар арасында экологиялық мәдениетті қалыптастыру мәселелері күн тәртібіне қойылды.
Аудан әкімі Д. Есілбек әр сала бойынша атқарылып жатқан жұмыстардың жай-күйіне жеке тоқталып, жауапты басшыларға нақты тапсырмалар жүктеді. Әсіресе, абаттандыру, инфрақұрылымдық жобаларды уақтылы әрі сапалы іске асыру, көшелер мен аулалардағы тазалықты сақтау, экологиялық ахуалды жақсарту, тұрғындарға қолайлы әрі қауіпсіз орта қалыптастыру міндеттері жүктелді.
Жиын барысында мемлекеттік қызметте жоғары нәтижелер көрсеткен, өз қызметіне жауапкершілікпен қарап, кәсіби біліктілігімен көзге түскен бірқатар қызметкерлер аудан әкімінің Алғыс хатымен марапатталды. Бұл марапат – мемлекеттік қызметшілердің еңбегін бағалау мен ынталандыруға бағытталған игі бастама.
Аппараттық мәжіліс қорытындысында аудан әкімі Д. Есілбек барлық тапсырмалардың орындалуын бақылауда ұстауды тапсырды. Әкімдік жұмысының басты мақсаты – тұрғындардың өмір сүру сапасын арттыру, ауданның инфрақұрылымын дамыту, экологиялық тепе-теңдікті сақтау және халықтың жайлы өмір сүруіне жағдай жасау екенін ерекше атап өтті. Қызметкерлерге өз салалары бойынша жүйелі әрі нәтижелі жұмыс атқару, бастамашыл болу, тұрғындардың ұсыныстары мен өтініштеріне дер кезінде жауап беру қажеттігі ескертілді.
Аудан әкімдігі алдағы уақытта да белгіленген жоспарлар мен бағдарламалар аясында тұрақты жұмыс істеп, ауданның әлеуметтік-экономикалық дамуын қамтамасыз ету, тұрғындардың әл-ауқатын арттыру бағытында жұмыстарды жалғастыра береді.
Comments