Шымкент қаласы Тұран ауданының тұрғыны Қамбар Ақылбек «AMANAT» партиясы Шымкент қаласы Тұран аудандық филиалына жүгініп, көпқабатты тұрғын үй ауласындағы балалар ойын алаңшасына қатысты алаңдаушылығын білдірді. Тұрғын ойын алаңшасының жағдайының күн өткен сайын нашарлап бара жатқанын атап өтіп, бұл мәселенің шешілуін тез арада талап етті. Тұрғын өз өтінішінде алаңшадағы ойын элементтерінің біразы жарамсыз екенін, бұл жағдай балалардың қауіпсіз ойнауына кедергі келтіріп отырғанын айтқан болатын.
Азаматтың бұл өтінішін Тұран аудандық партия филиалының атқарушы хатшысы Есімхан Бертаев дер кезінде аудан әкімдігіне жеткізіп, нақты шешім қабылдануына ықпал етті. Мәселенің шешілуі үшін партияның аудандық филиалы жергілікті билікпен және жауапты мекемелермен тығыз байланыс орнатты. Нәтижесінде, тиісті мекемелер ойын алаңшасына мамандар жіберіп, жарамсыз элементтерді жөндеу және қалпына келтіру жұмыстарын жүргізді. Жөндеу жұмыстары барысында жаңа әрі қауіпсіз ойын жабдықтары орнатылды, бұл балалар үшін ойнауға аса ыңғайлы әрі қауіпсіз алаңға айналды.
Жаңартылған ойын алаңшасына куә болған Қамбар Ақылбек өз ризашылығын білдіріп:
– Балалардың қауіпсіздігі бәрінен маңызды. Уақтылы әрекет етіп, мәселеге бейжай қарамағандарыңыз үшін үлкен алғыс айтамын. Бұл – тұрғындар үніне шынайы көңіл бөлудің көрінісі, – деді. Тұрғынның айтуынша, бұрынғы жағдаймен салыстырғанда жаңа алаңша балалардың денсаулығы мен көңіл-күйіне оң әсерін тигізіп отыр.
Бұл жағдай «AMANAT» партиясының тұрғындармен тығыз байланыс орнату арқылы нақты нәтижеге қол жеткізіп отырғанының айқын дәлелі. Сонымен қатар, партия өкілдері тұрғындардың өтінішіне дер кезінде жауап беріп, оларды нақты әрі тиімді шешімдермен қамтамасыз ету жолында жұмысты жалғастыра беретіндігін мәлімдеді. Қазіргі уақытта партияның барлық деңгейдегі филиалдары тұрғындардың мәселелеріне қатысты тұрақты мониторинг жүргізіп, әрдайым көмек көрсетуге дайын.
Comments