Шымкент қаласының Қаратау ауданына қарасты Тұран шағын ауданындағы «Адия» тұрғын үй кешенінде сапасыз құрылысқа байланысты туындаған мәселелер «AMANAT» партиясының Партиялық бақылау комиссиясының назарында. Партияның қалалық филиалы жанындағы комиссия кешенге арнайы барып, көшпелі жиын өткізді. Жиынның басты мақсаты — тұрғын үй сапасы мәселесіне халықтың көңілін аудару және оларды шешуге бағытталған нақты шаралар қабылдау болды.
Жиынға комиссия төрағасы Ғани Ташқараев, қалалық басқарма және аудандық әкімдік өкілдері, мердігер мекеме мамандары мен партия белсенділері қатысты. Олар тұрғындармен кездесіп, кешеннің қазіргі жай-күйімен танысты. Қатысушылар тарапынан келіп түскен сұрақтар мен пікірлерге жеке-жеке жауаптар берілді.
Айта кетейік, осыдан бір ай бұрын тұрғындар тарапынан түскен арыз-шағым негізінде алғашқы зерделеу жұмыстары жүргізілген болатын. Сол кезде тұрғындар үйдің сыртқы қабырғаларының сыланбағанын, кейбір пәтерлерде қабырғалардың көгеріп кеткенін, кәріз жүйесінің талапқа сай жүргізілмегенін айтып, жағымсыз иістің жайсыздық туғызып отырғанын жеткізген еді. Бұл жағдай тұрғындардың өмір сүру сапасына әсер етіп, оларды алаңдатып отырды.
Кездесу барысында «Адия Group» ЖШС директоры барлық кемшіліктерді мойындап, оларды жоюға уәде берген. Мердігер мекеме басшысы бұл мәселелерді шешу үшін қажетті шаралар қабылданатынын және жұмысшылардың саны мен қарқыны арттырылатынын айтты. Қазіргі таңда сыртқы жөндеу жұмыстары басталып, мердігер өкілдерінің айтуынша, жақын күндері толық аяқталуы тиіс. Ал кәріз жүйесіне қатысты арнайы мамандар сараптама жүргізіп, тиісті шешім қабылданатын болады. Тұрғын үйдің басқа да инфрақұрылымдық мәселелері бойынша қосымша зерттеулер жүргізу жоспарлануда.
Комиссия төрағасы Ғани Ташқараев бұл мәселенің партиялық бақылауда тұрғанын атап өтіп, уәделердің сапалы әрі уақытында орындалуы маңызды екенін еске салды.
— Бұл — ипотека арқылы алынған тұрғын үйлер. Азаматтар маңдай терімен тапқан қаржысына баспана сатып алған. Сондықтан үй сапасы соған сай болуы тиіс. Біз уәделердің орындалу барысын қайта келіп тексереміз, — деді ол. Ол сондай-ақ тұрғындардың құқықтарын қорғау және олардың өмір сүру жағдайларын жақсарту партияның басты мақсаттарының бірі екенін атап өтті.
Кездесу барысында тұрғындар коммуналдық қызметтердің түгелдей мемлекеттік меншікке берілгенін қалайтынын айтты. Бұл сұрақ бойынша жергілікті билік өкілдері азаматтардың пікірін ескеріп, жаңа ұсыныстарды қарастыруда. Сала мамандары бұл мәселені шешу жолдары қарастырылып жатқанын мәлімдеді. Тұрғындардың мүдделерін қорғау мақсатында барлық қажетті заңды шаралар қабылданатыны айтылды.
Comments