Шымкент қаласы Әл-Фараби ауданындағы Рашидов көшесі №25 үй ауласында орналасқан балалар ойын алаңшасы толығымен жаңартылды. Бұл игі іс — тұрғын өтініші негізінде жүзеге асқан нақты нәтиженің көрінісі.
Аталған аумақта тұратын көпбалалы ана Марифат Асланова «AMANAT» партиясының Әл-Фараби аудандық филиалы жанындағы Қоғамдық қабылдау бөлмесіне жүгініп, ойын алаңшаларының әбден тозып, балалар үшін қауіпті болып тұрғанын жеткізген еді.
Тұрғынның өтінішіне партия өкілдері жедел әрекет етті. Әл-Фараби аудандық филиалының атқарушы хатшысы Ердәулет Жүнісбек мәселені назарға алып, тиісті органдарға ресми хат жолдады. Қысқа уақыт ішінде аудан әкімдігі тарапынан қолдау табылып, ойын алаңшасы толықтай жаңартылып, балаларға қауіпсіз жағдай жасалды.
Марифат Асланова бұл іске ризашылығын білдіріп:
«Балаларымыз ойнайтын осы алаңның жағдайы алаңдататын. Қауіпті еді. Қоғамдық қабылдауға жүгінгеннен кейін мәселе тез шешілді. Партия өкілдеріне, аудан әкімдігіне алғысым шексіз. Ең бастысы – балаларымыз қуанып жүр», – деді.
«Айтылды – орындалды» қағидаты аясында орындалған бұл жұмыс — «AMANAT» партиясының халық үніне құлақ асып, нақты әрекетке көшетінін тағы бір дәлелдеді. Бұл – тұрғындармен тиімді кері байланыстың жарқын үлгісі.
Балалар алаңшасының жаңартылуы тек қана эстетикалық жағынан емес, экологиялық және қауіпсіздік тұрғысынан да маңызды. Қауіпсіз әрі таза ойын алаңдары балалардың денсаулығы мен дамуына оң ықпал етеді, сонымен қатар ата-аналардың сенімділігін арттырады. Қаланың экологиялық жағдайын жақсарту бағытындағы осындай жобалар — «Таза Қазақстан» бағдарламасының бір бөлігі ретінде қоғамдық кеңістіктерді абаттандыру мен қаланы таза ұстауға үлес қосады. Болашақта да тұрғындардың өмір сүру сапасын арттыруға бағытталған мұндай бастамалар жалғасын табатыны сөзсіз.
Comments