Шымкент қаласында бұқаралық спортты дамыту мақсатында кезекті ауқымды шара ұйымдастырылды. «AMANAT» партиясы Шымкент қалалық филиалының қолдауымен және Дене шынықтыруды дамыту және іс-шараларды өткізу дирекциясының ұйымдастыруымен «Күш Қуат Керуені» атты таңғы спорт мерекесі жоғары деңгейде өтті.
Салауатты өмір салтын насихаттаған бұл шараға «AMANAT» партиясы Шымкент қалалық филиалы төрағасының міндетін атқарушы Ербол Байқонысов, Тұран аудандық партия филиалының атқарушы хатшысы Есімхан Бертаев, Шымкент қалалық спорт басқармасының өкілдері және қала тұрғындары қатысты.
Салтанатты ашылу рәсімінде Ербол Байқонысов сөз сөйлеп, бұқаралық спортты дамыту партияның басты бағыттарының бірі екенін атап өтті:
«AMANAT» партиясының сайлауалды бағдарламасында қала аумағында спортпен шұғылданатын азаматтардың үлесін 42 пайыздан 50 пайызға дейін жеткізу мақсаты қойылған. Бұл бағытта бірқатар инфрақұрылымдық жобалар жүзеге асуда – спорт кешендерімен қатар, аулалар мен саябақтарда да тұрғындарға арналған спорт нысандары салынуда. Сонымен бірге, бұқаралық спортты кеңінен насихаттау бағытында түрлі форматтағы іс-шаралар өткізіліп келеді. Бүгінгі «Күш Қуат Керуені» соның айғағы. Баршаңызды мерекемен құттықтаймын, сәттілік пен сергектік тілеймін!» – деді ол.
Шара аясында таңғы серуен мен жаттығуды әдетке айналдырған қала тұрғындары өзара сайысқа түсті. Қаланың жеті ірі саябағы мен аллеясы – Дендропарк, Абай саябағы, Металлург саябағы, Әкімшілік аллеясы, Шим-Сити, Отбасы аллеясы және Жеңіс саябағынан жиналған командалар ән мен биден өнер көрсетіп, спорттық рухты дәріптеді.
Нәтижесінде:
• І орын – Абай саябағы командасы,
• ІІ орын – Әкімшілік аллеясы командасы,
• ІІІ орын – «Шим-Сити» командасы жеңіп шықты.
Жеңімпаздарға арнайы бағалы сыйлықтар табыс етілсе, барлық қатысушыларға естелік сыйлықтар үлестірілді.
Comments