Шымкент қаласының әкімі Ғабит Сыздықбековтің Абай ауданы тұрғындарымен көшпелі кездесуінде көтерілген мәселелер назардан тыс қалмай, нақты жұмыстар атқарылды. Тұрғындардың өтініші негізінде Абай ауданы, Дулатов көшесіне ұзындығы 120 метрді құрайтын аяқжол салынып, аялдама павильоны орнатылды. Сонымен қатар, осы көшенің Қасиет көшесімен қиылысатын тұсында ұзындығы 50 метр аяқжол салынды. Бұл жұмыстар қала тұрғындарының қауіпсіздігі мен жайлылығын арттыру мақсатында жүзеге асырылды. Белсенділік танытқан тұрғындар атқарылған іске ризашылығын білдірді.
Қала басшысы жергілікті тұрғындардың жайлы және қауіпсіз ортада өмір сүруі үшін осындай әлеуметтік нысандарды дамыту маңызды екенін атап өтті.
Сонымен бірге, 16–20 маусым аралығында Шымкент қаласының әкімі Ғабит Сыздықбеков тұрғындармен көшпелі кездесу өткізіп, халықтың ұсыныс-тілегін тыңдады. Нәтижесінде жер қатынастары басқармасына бірқатар нақты тапсырмалар жүктеліп, оларды орындау бойынша тиісті жұмыстар атқарылды.
Басты басымдық – мәселені тұрғынмен кері байланыс орната отырып, зерделеу. Қажетті жағдайларда актілер толтырылып, құзырлы органдарға хаттар жолданды. Атап айтқанда:
-
Мемлекет мұқтажы үшін алынатын жер учаскелеріне қатысты меншік иелерімен түсіндіру жұмыстары жүргізілді. Сондай-ақ жерге орналастыру жобасына өзгеріс енгізу бойынша ұсыныстар берілді;
-
Добролюбова көшесінде заңсыз орнатылған теңіз контейнерлері анықталып, тиісті шара қабылдау мақсатында құзырлы органға хат жолданды;
-
«Жасыл Жай» көшесіндегі игерілмеген жер телімдері зерделенді;
-
Қайтпас шағынауданында мазарат маңындағы жер учаскелеріне қатысты тұрғындарға түсіндірме берілді;
-
Т.Орынбаев және Ә.Жангелдин көшелері бойындағы жер учаскелеріне зерттеу жүргізіліп, заңдылықты тексеру мақсатында тиісті хаттар жолданды.
Қала әкімдігі тұрғындардың әрбір ұсынысы мен өтінішін жіті назарда ұстай отырып, оларды заң шеңберінде шешу бағытында нақты іс-шаралар қабылдайды.
Қоғамдық сенімді арттыру үшін ашықтық пен жауапкершілік маңызды екені ескеріліп, барлық жұмыстар кезең-кезеңімен және сапалы орындалуда.
Алдағы уақытта да қала тұрғындарымен ашық диалог жалғасып, көтерілген мәселелер шешімін табатын болады.
Comments