Шымкент қаласы Қаратау ауданына қарасты Шапырашты тұрғын алабында заманауи талаптарға сай салынған гүлзар мен спорт алаңшасының салтанатты ашылу рәсімі өтті. Бұл әлеуметтік маңызы бар нысандар «Халық қатысатын бюджет» бағдарламасы аясында жүзеге асырылып, жергілікті тұрғындардың ұсынысы негізінде салынды.
Салтанатты іс-шараға қала әкімдігінің өкілдері, мәслихат депутаттары, зиялы қауым мүшелері мен аудан тұрғындары қатысты. Жиналған жұрт жаңа демалыс және спорт аймағының ашылуын ерекше ықыласпен қарсы алды. Ашылу барысында сөз сөйлеген қонақтар елді мекендердің инфрақұрылымын жақсарту мен тұрғындардың өмір сүру сапасын арттыруда мұндай жобалардың маңызын ерекше атап өтті.
Аталған нысандар заманауи стандарттарға толық сай салынған. Гүлзар аумағы көгалдандырылып, декоративті өсімдіктермен көркейтілген. Орындықтар, жарықтандыру шамдары, жаяу жүргінші жолдары орнатылған. Ал спорт алаңшасы арнайы жабындымен жабдықталып, воркаут элементтері мен көпфункциялы жаттығу құрылғыларымен толықтырылған. Бұл тұрғындардың дене шынықтырумен айналысуына, белсенді өмір салтын ұстануына зор мүмкіндік береді.
Айта кету керек, Қаратау ауданы аумағында биылғы жылы тұрғындар игілігі үшін ауқымды жұмыстар жоспарланған. Атап айтқанда, 2024 жылы 12 гүлзар, 24 балалар ойын алаңшасы және 3 спорт алаңшасын салу көзделген. Бүгінгі күнге дейін соның ішінде 13 балалар ойын алаңшасы мен 6 гүлзар ел игілігіне пайдалануға берілді. Қалған 11 балалар ойын алаңшасы мен 6 гүлзарды жылдың соңына дейін толық аяқтап, пайдалануға тапсыру жоспарланып отыр.
«Халық қатысатын бюджет» бағдарламасы аясында атқарылып жатқан мұндай жобалар тұрғындардың ұсыныстары мен талаптарына негізделіп іске асырылуы – қоғамдық бақылау мен жергілікті бастамалардың нәтижелі екенінің көрінісі. Мұндай жобалар алдағы уақытта да жалғасын тауып, қаланың әрбір аумағында өмір сапасын арттыруға өз үлесін қоса бермек.
Comments