Шымкент қаласының аумағында масалар мен өзге де зиянды жәндіктерге қарсы залалсыздандыру (дезинсекция) жұмыстары бекітілген кесте мен жоспарға сәйкес жүйелі түрде жүргізілуде. Бұл жұмыстар қала аумағындағы санитарлық-эпидемиологиялық қауіпсіздікті қамтамасыз ету мақсатында қолға алынған.
Қазіргі таңда дезинсекциялық өңдеу жұмыстары негізінен халық көп жиналатын орындарда – саябақтарда, гүлзарларда, демалыс аймақтарында, сонымен қатар өзендер мен канал жағалаулары бойында қарқынды түрде жүргізіліп жатыр. Әсіресе, масалар жиі кездесетін ылғалды және батпақты жерлерге ерекше назар аударылған.
Зиянды жәндіктерге қарсы қолданылатын химиялық құралдар арнайы рұқсат етілген, санитарлық талаптарға сай және адам денсаулығына қауіп төндірмейтін дәрілік қоспалармен жүзеге асырылуда. Соған қарамастан, залалсыздандыру шаралары жүргізіліп жатқан уақытта тұрғындарға белгілі бір қауіпсіздік ережелерін сақтау қажет екені ескертіледі.
Атап айтқанда, химиялық өңдеу жүргізілген аумақтарда балалардың ойнауына жол бермеу, үй жануарларын ол жерлерден аулақ ұстау, сондай-ақ тұрмыстық заттардың залалсыздандырылған беттермен тікелей жанаспауын қамтамасыз ету – аса маңызды. Бұл – денсаулыққа кері әсерді болдырмаудың негізгі алғышарты.
Сонымен қатар, тұрғындарға жеке аулалар мен үй-жайлардың тазалығын сақтау, тұрмыстық қалдықтарды уақтылы шығару, ашық алаңдарда су жиналуын болдырмау секілді қарапайым санитарлық ережелерді ұстану ұсынылады. Ылғал орта – масалар мен басқа да зиянкестердің шоғырланып, көбеюіне ең қолайлы жағдай. Сондықтан судың ашық жерде тұрып қалмауын қамтамасыз ету – залалсыздандыру жұмыстарының тиімділігін арттыратын қосымша амал.
Қажет болған жағдайда, тұрғындар жеке аулаларында немесе кәсіпкерлік нысандарында залалсыздандыру жұмыстарын өз қаражаты есебінен арнайы лицензиясы бар ұйымдардың көмегімен жүргізе алады. Бұл, әсіресе, жеке үйлер, дәмханалар, азық-түлік сататын дүкендер және қоғамдық тамақтану орындары үшін маңызды.
Қала әкімдігі тұрғындарды өз денсаулығы мен қоршаған ортаға жауапкершілікпен қарап, санитарлық талаптарды сақтауға шақырады. Жаппай дезинсекциялық жұмыстар жазғы маусым бойы кезең-кезеңімен жалғасатын болады.
Comments