Шымкент қаласындағы Жібек жолы көшесінің бойында орналасқан көпшілікке таныс «Көктем» базары жаңа даму кезеңіне қадам басуда. Сауда орны өз жұмысын тоқтатпай, кезең-кезеңімен жаңа, заманауи форматтағы сауда орталығына көшіріліп жатыр. Бұл жаңғырту – қала аумағындағы сауда инфрақұрылымын жақсарту және кәсіпкерлерге де, тұтынушыларға да ыңғайлы жағдай жасауға бағытталған маңызды бастама.
Қазіргі таңда бұрынғы базар аумағында үш қабатты жаңа сауда орталығы бой көтерді. Бұл кешен заманауи стандарттарға сай жабдықталған және өрт қауіпсіздігі, санитарлық талаптар секілді негізгі ережелерге толық сәйкес келеді. Жаңа орталықта жұмыс істеуге қажетті барлық инфрақұрылым қарастырылған: желдету, жарықтандыру, өрт сөндіру жүйесі, санитарлық-тұрмыстық жайлар, жүк түсіру аймақтары мен автотұрақтар – бәрі кәсіпкерлер мен келушілердің ыңғайына бейімделіп жасалған.
Жалпы аумағы 7 200 шаршы метрді құрайтын жаңа сауда орталығының ішкі кеңістігі жүйелі түрде ұйымдастырылған. Қабаттарға тауар түрлері бойынша нақты бағыттар белгіленген:
-
1-қабат – сантехника және құрылыс материалдары;
-
2-қабат – көкөніс, жеміс-жидек, ет өнімдері мен күнделікті тұтыну тауарлары;
-
3-қабат – киім-кешек, ойыншықтар және халық тұтынатын басқа да тауарлар.
Сауда орындарының ішкі жайлылығы мен кеңдігі кәсіпкерлер үшін тиімді жұмыс істеуге мүмкіндік береді. Ең бастысы – жаңа ғимаратқа көшкенімен, кәсіпкерлерге ұсынылатын жалдау бағасы бұрынғы деңгейде сақталып отыр. Мысалы, көлемі 2х3 метр болатын сауда орнын бұған дейін 25 000 теңгеге жалға алған кәсіпкер енді дәл осы бағада жаңа орталықта жұмысын жалғастыра алады. Бұл шешім шағын және орта кәсіп иелерін қолдауға бағытталған.
Көшіру жұмыстары сатушылар мен саудагерлерге қолайсыздық туғызбауы үшін кезең-кезеңімен жүргізілуде. Әр кәсіпкерге алдын ала белгіленген сауда орны қарастырылып, ақпараттық-түсіндіру жұмыстары ұйымдастырылған. Қазіргі уақытта сатушылар жаңа орталыққа қоныстанып жатыр, сауда үрдісі үздіксіз жалғасуда.
Аталған бастама – тек инфрақұрылымды жақсартуға ғана емес, қаладағы сауда мәдениетін жаңа деңгейге көтеруге де бағытталған. Мұндай жүйелі қадамдар Шымкент қаласының заманауи мегаполис ретінде дамуына, кәсіпкерлікті қолдау мен қалалық ортаның тартымдылығын арттыруға үлес қосатыны сөзсіз.
Қала әкімдігі алдағы уақытта да сауда нысандарын жаңғырту мен жетілдіру бағытында нақты жұмыстар жүргізетінін хабарлайды.
Comments