Қоғам үшін тазалық – жай ғана ұстаным емес, бұл – өмір салты. Әсіресе адам көп шоғырланған, денсаулық пен демалыс қатар жүретін орындарда тазалықтың рөлі екі еселенеді. Қаратал ауданының санитариялық-эпидемиологиялық бақылау басқармасы маманы Жетісу облысы Кәсіпкерлер палатасының Қаратал аудандық филиалының ақпараттық алаңында осы мәселені алға тартып, Үштөбе қаласындағы бассейн қызметін ұсынушы кәсіпкерге санитариялық талаптарды егжей-тегжейлі түсіндірді.
Бұл – жай ғана түсіндіру жұмысы емес, бұл – тазалық пен жауапкершілікке үндеген үн. Себебі бассейн – адам ағзасы үшін тек су емес, сенім де. Тазалығы сақталмаған су – сырқаттың көзі. Ал талапқа сай тазартылған бассейн – тәнге қуат, жанға тыныштық сыйлайды.
Бүгінгі қоғамда кәсіпкердің табысы тек қызмет көрсетуімен емес, адам денсаулығына деген қамқорлығымен де өлшенеді. Санитариялық-эпидемиологиялық талаптар – кедергі емес, керісінше – сапаның кепілі. Үштөбе қаласында жүргізілген бұл түсіндіру – тазалық мәдениетіне қосылған нақты үлес.
Тазалық – көзге көрінбейтін, бірақ сезілетін құндылық. Ол ескерусіз қалса, кесел келер. Ал ескеріліп, сақталса – ел аман, жұрт тыныш. Сондықтан әрбір кәсіпкер, әрбір тұрғын бұл талаптарды орындауды өзіне парыз санауы керек. Өйткені біз тазалықты құрметтесек, ол да бізді қорғайды.
Қобланды АБЕНОВ
Comments