Шымкент қаласында құқық бұзушылықтардың алдын алу және қаланың санитарлық-экологиялық жағдайын жақсарту мақсатында Әл-Фараби ауданы аумағында заңсыз құрылыс пен қоқыс тастауға қарсы кең ауқымды рейдтік іс-шара өткізілді. Бұл шара аудан әкімдігі мен Шымкент қалалық полиция департаментінің жергілікті полиция қызметі бірлесе жүзеге асырған жүйелі жұмыстың бір бөлігі болып табылады.
Рейд барысында Қарасу шағынауданында бірнеше құқық бұзушылық фактілері анықталды. Атап айтқанда, №65 көпқабатты тұрғын үйдің кейбір тұрғындары рұқсатсыз құрылыс жұмыстарын жүргізіп, құрылыс қалдықтарын тұрғын үй ауласына шығарған. Аталған әрекеттер қаланың сәулет және экологиялық нормаларына қайшы келіп, қоғамдық орындардың тазалығы мен қауіпсіздігіне нұқсан келтірген.
Тексеру барысында құқық бұзушыларға ҚР заңнамасы бойынша түсіндіру жұмыстары жүргізіліп, заңсыз әрекеттерді дереу тоқтату және аумақты бастапқы қалпына келтіру туралы жазбаша міндеттемелер алынды.
Нәтижесінде тұрғындар заң талаптарын ескеріп, құрылыс жұмыстарын тоқтатып, аумақты тазарту шараларын қолға алды. Бұл жағдай құқықтық мәдениетті қалыптастыру мен қоғамдық жауапкершілікті арттыруда маңызды қадам ретінде бағаланып отыр.
Шымкент қаласының әкімдігі мұндай рейдтік шараларды тұрақты түрде жалғастыруды жоспарлап отыр. Бұл – қаланың құқықтық тәртібін нығайту, санитарлық тазалықты сақтау және тұрғындардың өмір сүру сапасын арттыруға бағытталған жүйелі жұмыстардың бір бөлігі.
Қала тұрғындарына қоғамдық тәртіпке бей-жай қарамауға, заңға бағынуға, және өз ортасына жауапкершілікпен қарауға шақыру – әкімдік пен құқық қорғау органдары жұмысының басты қағидаты болып қала береді.
Қала әкімдігі тұрғындарға қолданыстағы заңнама талаптарын сақтау қажеттігін еске салады. Атап айтқанда:
Қазақстан Республикасы Әкімшілік құқық бұзушылық туралы кодексінің 505-бабына сәйкес:
Қалалар мен елді мекендерді абаттандыру қағидаларын бұзу, инфрақұрылым нысандарын бүлдіру немесе жасыл желектерді жою:
Бірінші рет: ескерту немесе 20 АЕК (2025 жылы – 73 840 теңге) айыппұл.
Қайталанған жағдайда: 30 АЕК (110 760 теңге) айыппұл.
434-2-бапқа сәйкес:
Ортақ пайдаланылатын орындарды ластау:
Бірінші рет: 5 АЕК – 18 460 теңге.
Қайталанған жағдайда: 10 АЕК – 36 920 теңге.
Comments