КЕНТАУДА ҚОҒАМДЫҚ ТАМАҚТАНУ ОРЫНДАРЫНА ТҰРАҚТЫ БАҚЫЛАУ ЖҮРГІЗІЛЕДІ

Кентау қаласында халықтың денсаулығын қорғау және қоғамдық тамақтану орындарындағы тағам қауіпсіздігін қамтамасыз ету мақсатында тұрақты және жүйелі бақылау шаралары ұйымдастырылуда. Бұл жөнінде Кентау қалалық кәсіпкерлік және ауыл шаруашылығы бөлімі жүргізген түсіндіру жұмыстары барысында жан-жақты ақпарат берілді. Қоғамдық тамақтану орындарында тағамнан улану оқиғаларының алдын алу – ең өзекті мәселелердің бірі. Осы орайда, кәсіпкерлер мен мейрамхана, дәмхана, кафе, фастфуд орталықтарының жауапты тұлғаларымен арнайы кездесулер ұйымдастырылып, санитариялық талаптар мен гигиена нормаларының сақталуының маңызы түсіндірілді.
Жиынға қала әкімінің орынбасары Нұрбол Көкенов төрағалық етті. Ол өз сөзінде қоғамдық тамақтану орындарының санитарлық-эпидемиологиялық ахуалын жақсарту – тұрғындардың денсаулығын қорғаудың негізгі бағыттарының бірі екенін атап өтті. Сонымен қатар, кәсіпкерлердің жауапкершілігін арттыру, санитарлық нормаларды қатаң сақтау және тұтынушыларға сапалы әрі қауіпсіз өнімдер ұсыну жөніндегі міндеттерін нақтылады.
Кентау қалалық санитариялық-эпидемиологиялық бақылау басқармасының басшысы Нұрбақыт Рабат өз баяндамасында қоғамдық тамақтану орындарына қойылатын талаптарды егжей-тегжейлі түсіндірді. Ол тағамды дайындау, сақтау және ұсыну кезінде санитарлық нормаларды қатаң сақтау қажеттігін айтты. Сонымен қатар, тағам өнімдерінің жарамдылық мерзімін қадағалау, құрал-жабдықтардың тазалығы, қызметкерлердің жеке гигиенасын қамтамасыз ету секілді аспектілерге ерекше назар аудару керек екенін ерекше атап өтті.
Нұрбақыт Рабат сондай-ақ, қоғамдық тамақтану орындарында жүргізілетін тексерулердің жиілігі мен көлемі артатынын хабарлады. Бұл іс-шаралардың мақсаты – тағам қауіпсіздігін қамтамасыз ету, улану жағдайларының алдын алу және тұтынушылардың құқықтарын қорғау болып табылады. Сонымен қатар, санитарлық талаптарды бұзған кәсіпкерлерге қатысты қатаң шаралар қабылданатыны ескертілді.
Жиын барысында кәсіпкерлер тарапынан қойылған сұрақтарға жауап беріліп, тәжірибелік кеңестер берілді. Мәселен, тағам өнімдерін дұрыс сақтау мен өңдеу әдістері, қызметкерлердің санитарлық білімін жетілдіру жолдары және тұтынушылардың құқықтарын қорғау мәселелері талқыланды. Бұл бағыттағы бірлескен жұмыс сапалы қызмет көрсету мен санитарлық нормаларды сақтау деңгейін айтарлықтай жақсартатыны сөз болды.
Жиын соңында қала әкімінің орынбасары Нұрбол Көкенов қоғамдық тамақтану орындарына тұрақты бақылау жүргізудің маңыздылығын тағы да атап өтіп, кәсіпкерлерді санитарлық талаптарды қатаң сақтауға шақырды. Оның айтуынша, тағам қауіпсіздігі – тек қана мемлекеттік бақылау органы ғана емес, сонымен қатар әрбір кәсіпкердің, қызметкердің және тұтынушының да ортақ жауапкершілігі.
Кентау қаласында тұрғындардың денсаулығын сақтау және тағам қауіпсіздігін қамтамасыз ету бағытындағы жұмыстар алдағы уақытта да жалғасын табатын болады. Бұл үшін қалалық кәсіпкерлік және ауыл шаруашылығы бөлімі мен санитариялық-эпидемиологиялық бақылау басқармасы кәсіпкерлермен тығыз ынтымақтастықта болып, түсіндіру және мониторинг шараларын жүйелі түрде жүргізуді жоспарлап отыр.
Қоғамдық тамақтану орындарындағы сапалы әрі қауіпсіз тағам – тұрғындардың денсаулығы мен әл-ауқатының кепілі. Сондықтан бұл саладағы қатаң бақылау мен тәртіп кәсіпкерлердің де, тұтынушылардың да мүддесіне қызмет етеді. Кентау қаласы осы бағытта барлық мүмкіндіктерін пайдаланып, тұрғындар мен қонақтардың сенімін арттыруға тырысады.