БАЛАЛАР ҚУАНҒАН КҮН

1 маусым – Халықаралық балаларды қорғау күні аясында Кентау қаласында «Бала – әлемнің ең нәзік те, ең қымбат сыйы» атты мерекелік іс-шара ұйымдастырылды. Бұл күн – әрбір баланың құқығын қорғау мен олардың бақытты, қауіпсіз өмір сүруіне жағдай жасауға арналған ерекше мереке. Биылғы шараның басты мақсаты – ерекше күтімді қажет ететін балаларға қолдау көрсету, олардың жүрегіне жылулық ұялату және қоғамның мейірімділік пен қамқорлыққа толы екенін сезіндіру болды.
Мерекелік іс-шараны ұйымдастыруда «Кентау Болашағы Үшін» қоғамдық бірлестігі белсенділік танытып, Кентау қалалық Қазақстан халқы Ассамблеясы жанындағы «Аналар кеңесі» және «Қоғамдық келісім» КММ Кентау қалалық филиалының қолдауымен өткізілді. Бұл ұйымдар ерекше балаларға деген қамқорлықты арттыруға бағытталған түрлі жобалар мен шараларды тұрақты түрде ұйымдастырып келеді. Олар осындай мерекелік сәттерде балалардың жан дүниесін көтеріп, оларға өмірге деген сенім мен қуаныш сыйлауға барынша күш салады.
Іс-шараға Кентау қаласының әкімінің орынбасары Ақнұр Байболова арнайы қатысып, ерекше күтімді қажет ететін балалар мен олардың ата-аналарын мерекемен шын жүректен құттықтады. Ол балаларға мықты денсаулық, бақыт пен жарқын болашақ тіледі. Сонымен бірге, ата-аналарға балаларын тәрбиелеп, қолдау көрсетуде табыс пен сабыр тілеп, мемлекеттік тараптан жасалып жатқан қамқорлық пен қолдауларға тоқталды.
Мерекелік бағдарламаның шымылдығын керемет концерт ашты. Кентау қаласының өнерлі балалары өздерінің өнерлерін ортаға салып, ән айтып, би билеп, көрермендерді тәнті етті. Әсіресе, ерекше балалардың да өнер көрсетуі көпшілікті терең толғандырды. Олардың ерік-жігері, рухы мен таланты баршаға үлгі болды. Сонымен қатар, мерекеде балаларға арналған түрлі ойын-сауықтар ұйымдастырылып, олар белсенділік танытып, бірге ойнап, бір-бірімен танысып, шынайы қуанышқа бөленді.
Шараның тағы бір маңызды бөлігі – балаларға тарту етілген сыйлықтар болды. Әрбір бала өзіне арналған кішкентай да болса қуаныш сыйлаған сыйлықтарға қуанғаны байқалды. Бұл сәт балалардың жүзіндегі шат күлкіге, қуаныш пен ризашылыққа толы болды. Ата-аналардың да алғыстары шексіз, олар балалары үшін осындай мәнді әрі жылы іс-шаралар ұйымдастырылғанына ризашылығын білдірді.
Бұл мерекелік іс-шара тек қана көңіл көтеру емес, сонымен қатар қоғамдағы мейірімділік пен адамгершіліктің көрінісі болды. Әрбір бала өмірде ерекше қамқорлыққа және махаббатқа лайық. Осы мерекенің арқасында қоғам мүшелері ерекше күтімді қажет ететін балалардың қажеттіліктері мен мәселелеріне көңіл бөлуді әрі қарай күшейтуді мақсат етеді.
Кентау қаласында өткізілген бұл іс-шараның маңызы зор. Ол балаларды қорғау мен олардың құқығын насихаттаудың бірден бір көрінісі. Сонымен қатар, бұл шара арқылы қала тұрғындары мейірімділік пен қамқорлықтың шынайы үлгісін көріп, балаларға деген сүйіспеншілік пен құрметтің қаншалықты маңызды екенін тағы бір мәрте ұғынады.
Осылайша, «Бала – әлемнің ең нәзік те, ең қымбат сыйы» атты мерекелік іс-шара балалардың жан-дүниесін жақындастырып, оларға шынайы мейірім мен қамқорлық сезімін сыйлады. Бұл күні балалардың жүзіндегі күлкі мен шаттық, ата-аналардың жылы лебізі мерекенің ең үлкен жетістігі болды. Келешек ұрпақтың бақыты үшін осындай игі шаралар әрі қарай да жалғаса бермек.