ТҮРКІСТАН: ЖЕТІСАЙДА ЗАМАНАУИ ҚОҒАМДЫҚ КӨЛІКТЕРДІҢ САНЫ АРТТЫ

Жетісай ауданының қоғамдық көлік саласында маңызды өзгерістер мен жаңартулар жүзеге асырылуда. Соңғы жылдары аудан тұрғындарының қала орталығына және аудандық деңгейдегі басқа да бағыттарға қатынауын жеңілдету және сапалы жолаушылар тасымалын қамтамасыз ету мәселесі өзекті болып тұрды. Осы орайда, аудан әкімінің Серік Мамытовтың тікелей тапсырмасымен заманауи талаптарға сай 14 шағын автобус мемлекет меншігіне қабылданып, тұрғындар игілігіне берілді.
Бұл жаңа қоғамдық көліктердің негізгі мақсаты – заңсыз жолаушылар тасымалына тосқауыл қою, қоғамдық көліктер мен жеке такси қызметтерін жүйелі түрде реттеу және жол жүру ережелерін қатаң сақтауды қамтамасыз ету болып табылады. Сонымен қатар, жаңа автокөліктердің техникалық қауіпсіздігі жоғары деңгейде болып, жолаушылардың өмірі мен денсаулығын қорғау басты назарда.
Жетісай ауданының аумағында жолаушыларды тасымалдаумен айналысатын «SAR avto» ЖШС арнайы мемлекеттік бағдарлама аясында аудан орталығына қатынайтын қоғамдық көлік бағыттарының санын арттыруда. Қазіргі уақытта бұл компания 10 бағыт бойынша қызмет көрсетіп, тұрғындардың қажеттіліктерін барынша ескере отырып, қоғамдық көліктер санын ұлғайтуға бағытталған жұмыстарды жүйелі түрде жүргізіп келеді.
Мемлекет тарапынан берілген қолдау аясында, 2021 жылғы 2 қыркүйектегі №604 қаулы негізінде «Өнеркәсіпті дамыту қоры» акционерлік қоғамының жеңілдетілген лизингтік қаржыландыруы арқылы сатып алынған отандық көліктер аудан тұрғындарының сапалы және қауіпсіз тасымалдауын қамтамасыз етуде. Бұл көліктер заманауи технологиялармен жабдықталған. Мысалы, көліктерде жолаушылар үшін ыңғайлы, эргономикалық орындықтар орнатылған, қауіпсіздік белбеулерімен қамтамасыз етілген, сондай-ақ ыстық және суық мезгілдерде жайлы болу үшін мұздатқыш және желдеткіш жүйелері де бар.
Қоғамдық көлік жүргізушілері үшін де арнайы тәртіп пен талаптар белгіленіп, жол жүру ережелерін қатаң сақтауға ерекше көңіл бөлінуде. Бұл бағыттағы бақылау жүйелері күшейтіліп, кез келген заң бұзушылықтар анықталған жағдайда тиісті шаралар қолданылуда. Жетісай ауданының әкімдігі қоғамдық көлік саласын дамыту арқылы тұрғындардың күнделікті өмір сапасын арттыруға және жол-көлік оқиғаларының алдын алуға ниетті.
Қоғамдық көлік саласындағы бұл өзгерістер жергілікті тұрғындардың үлкен қолдауына ие болуда. Аудан тұрғындары енді сапалы, қауіпсіз және қолжетімді қоғамдық көліктерге ие болып, аудан орталығы мен елді мекендер арасында жүруді жеңілдетті. Бұл, әсіресе, зейнеткерлер, студенттер және жұмысқа қатынайтын азаматтар үшін үлкен жеңілдік болып отыр.
Сонымен бірге, аудан әкімдігі қоғамдық көлік саласындағы жұмыстарды әрі қарай жалғастырып, такси қызметтерін де реттеуді күшейту жоспарын жасақтауда. Жеке такси жүргізушілері де жаңа талаптарға сай көлік құралдарын жаңартып, жолаушылардың қауіпсіздігі мен жайлылығын қамтамасыз етуге міндетті.
Жетісай ауданында жүзеге асып жатқан қоғамдық көлік жаңғырту бағдарламасы – бұл тек көлік санын көбейту ғана емес, сонымен қатар тұрғындардың қауіпсіздігі мен ыңғайлығын қамтамасыз ететін кешенді шаралар жиынтығы. Алдағы уақытта да ауданның дамуы мен халықтың өмір сапасының жақсаруы үшін осындай жүйелі әрі мақсатты жұмыстар жалғасын табатын болады.