ТҮРКІСТАН: САУРАНДА КӨПІР ПАЙДАЛАНУҒА БЕРІЛДІ

Сауран ауданында облыстық маңызы бар КХ-59 «Түркістан–Қарнақ» автожолының бойында орналасқан көпірдің күрделі жөндеуден кейінгі салтанатты ашылуы өтті. Бұл нысан – өңірдегі жол-көлік инфрақұрылымын жаңғырту және халықтың қауіпсіз қозғалысын қамтамасыз ету бағытындағы жүйелі жұмыстың нәтижесі.
Ашылу рәсіміне Түркістан облысы әкімінің бірінші орынбасары Зұлпыхар Жолдасов арнайы қатысып, көпірдің ел игілігіне берілуімен жиналған тұрғындарды құттықтады. Өз сөзінде ол өңір басшылығының тапсырмасына сәйкес, облыс аумағында инфрақұрылымдық жобаларға ерекше көңіл бөлініп отырғанын атап өтті.
– Бұл көпір тек көлік қозғалысын қамтамасыз ететін инженерлік нысан ғана емес, ауыл мен қала арасындағы әлеуметтік және экономикалық байланысты нығайтатын маңызды құрылым. Мұндай жобалар тұрғындар өмірін жеңілдетуге, жол қозғалысы қауіпсіздігін арттыруға және өңірдің даму қарқынын жеделдетуге бағытталған, – деді Зұлпыхар Жолдасов.
Жалпы ұзындығы 72 метр, ал ені 9 метрді құрайтын бұл көпір Сауран ауданы аумағындағы көлік қатынасының стратегиялық маңызды нүктелерінің бірі саналады. Күрделі жөндеу жұмыстары 2024 жылы басталып, 2025 жылдың алғашқы жартысында толық аяқталды. Жобаның жүзеге асуы тұрғындар үшін ғана емес, жүк тасымалы және ауыл шаруашылығы өнімдерін жеткізу тұрғысынан да айрықша маңызға ие.
Жөндеу жұмыстары барысында ескі көпір толық бұзылып, оның орнына жаңа заманауи талаптарға сай құрылым салынды. Атап айтқанда, 72 дана темірбетон қада қағылып, ұзындығы 24 метр болатын 27 дана темірбетон плита орнатылды. Сонымен қатар, жаңа қоршаулар мен заманауи стандартқа сай асфальт жабындысы төселді. Құрылыс кезінде көлік қозғалысын үзбеу мақсатында ұзындығы 820 метрлік айналма жол салынып, уақытша пайдалануға берілді.
Көпірдің күрделі жөндеуі Түркістан облысының Жолаушылар көлігі және автомобиль жолдары басқармасының тапсырысымен жүзеге асырылды. Жобаны іске асыру кезінде сапа мен қауіпсіздік талаптары бірінші кезекке қойылып, барлық жұмыстар халықаралық стандарттарға сай орындалды.
Аталған көпір тек жол қатынасын жақсартумен шектелмей, ауыл тұрғындарының қаламен байланысын жеңілдетуге, жедел жәрдем, өрт сөндіру қызметі секілді шұғыл қызметтердің кедергісіз қозғалуына, балалардың мектепке қауіпсіз жетуіне де тікелей ықпал етеді. Бұл – тұрғындардың күнделікті өмір сапасын арттыратын, жергілікті халықтың өмір сүру деңгейіне оң әсер ететін маңызды нысан.
Салтанатты іс-шара барысында жергілікті тұрғындар да сөз сөйлеп, көпірдің қайта салынуына ризашылықтарын білдірді. Олар бұл нысанның ашылуы ауылдың әлеуетін арттыруға және жол қатынасын жеңілдетуге зор үлес қосатынын атап өтті.
Алдағы уақытта Түркістан облысында, оның ішінде Сауран ауданында инфрақұрылымды дамыту, жолдарды жаңарту және жаңа әлеуметтік нысандар салу бойынша жоспарлы жұмыстар жалғасады. Атап айтқанда, 2025–2027 жылдарға арналған өңірлік даму бағдарламасы аясында бірнеше жаңа көпір, жол учаскелері және ауылішілік инфрақұрылым нысандарының құрылысы көзделуде. Бұл өз кезегінде өңір тұрғындарына қолайлы жағдай жасап, Түркістан облысының әлеуметтік-экономикалық дамуына жаңа серпін береді.