✅Елімізде Мемлекет басшысы Қасым-Жомарт Тоқаевтың бастамасымен «Әкімдер мектебі» жобасы қолға алынды. Жоба аясында Жетісу облысы бойынша 114 әкім білім алуда.
🔹Ел Президенті Үкіметтің кеңейтілген отырысында «Әкімдер мектебі» оқыту жобасын іске қосуды тапсырып, «АMANAT» партиясының тәжірибесін ескерген жөн екенін атап өткен болатын. Нәтижесінде, партия қабырғасында Үкіметтің Өңірлік саясат жөніндегі жобалық кеңсесі Сараптамалық орталығы ашылды.
🔸Осы жобалық кеңсе атқаратын жұмыс аясында әр ауылдық округтің экономикалық даму бағдарламасын әзірлеу көзделуде.
🔹Осылайша, әкімдерді оқыту жұмысы биыл 17 ақпанда басталып, 13 мамырда аяқталады. Оқу бағдарламасына сәйкес, әкімдер бас-аяғы 240 сағат дәріс алады. Соның ішінде, 140 сағат – Президент жанындағы Мемлекеттік Басқару академиясының, 100 сағат – «AMANAT» партиясының Саяси менеджмент академиясының тәлімгерлері білім береді.
🔸Партия тәлімгерлері негізінен экономикалық бағытты қамтиды. Тақырып – «Ауылдық округтердің экономикалық даму бағдарламаларын әзірлеу».
Бағдарлама бас-аяғы 3 кезеңнен тұрады.
✅Бірінші кезеңде ауыл әкімдері маркетингтік зерттеу жүргізуді, яғни, скрининг жасауды, ауылдық округтердің мүмкіндігі мен ол жерде өндірілетін өнімдердің тауарлық массасын анықтауды және басым бағыттарды зерттей білуді, айқындауды үйренеді.
✅Екінші кезеңде партия тәлімгерлері сату нарығы бар тауарлар бойынша кооперативтік жобаларды әзірлеуді үйретеді. Мәселен, 500 тонна картоп өндіретін кооператив құруға не қажет деген сұрақтың жауабын іздейді.
✅Үшінші кезеңде әкімдер осы жан-жақты зерттелген, есеп-қисабы жасалған, тиімділігі айқындалған жобаны Ауылдық округтердің экономикалық даму бағдарламасына негіздеме ретінде пайдалануға үйренеді.
🗓️Осылайша, 17 ақпаннан 13 мамырға дейін жалғасатын оқыту жұмысы барысында әр ауылдық округ әкімі өз округінің экономикалық даму бағдарламасын әзірлеп шығуға тиіс.
Comments