ҒАЛЫМНЫҢ ЕҢБЕГІ ЕЛЕНДІ

Бүгін М.Әуезов атындағы Оңтүстік Қазақстан университетінде «Инженерлік білім және ғылым: цифрлық экономиканың сын-қатерлері» атты академик Жақсылық Үшкемпірұлы Мырхалықовтың 70 жылдығына арналған Халықаралық ғылыми–тәжірибелік конференция өтті.
Жұмахан Үшкемпірұлы — 2012-2018 жылдары М. Әуезов атындағы ОҚМУ ректоры, техника ғылымдарының докторы, профессор, Қазақстан Республикасы Ұлттық Ғылым Академиясының, Қазақстан Республикасы Ұлттық инженерлік ғылым академиясының, Халықаралық инженерлік ғылымдар академиясының академигі. Академиктің оңтүстік өңірінің ғылым, білім саласына қосқан үлесі зор.
Шымкент қаласындағы іргелі оқу орнында өткен ғылыми-тәжірибелік конференцияға шетелдік және еліміздегі жоғарғы оқу орындарының ғалымдары, өндіріс орындарының басшылары қатысты. Айтулы шараға арнайы шақырылған «AMANAT» партиясы Түркістан облыстық филиалының төрағасы, облыстық мәслихат депутаты Алтынсары Үмбетәлиев мерей той иесі Жақсылық Мырхалықовты мерейлі жасымен құттықтады. «Әрбір адамның өзіне тән ғұмыр жолы, тіршілік баяны бар, бірақ еткен еңбек, көрген бейнет, татқан зейнет, алған асу, жеткен биік әркімнің өмірінде әрқилы. Сіздің қаншама шәкірттеріңіз мемлекетіміздің түрлі салаларында Егеменді еліміздің экономикасының өркендеуіне, халқымыздың әл-ауқатының жақсаруына аянбай адал қызмет етуде. Саналы ғұмырыңызды білім саласының дамуына арнап, жастардың сапалы білім мен тәрбие алуына мол үлес қостыңыз. Отанымыздың өркендеуі және халқымыздың игілігі жолында, әлі де талай тәнті істерді атқарарыңызға кәміл сенімдімін»,—деп атап өтті Алтынсары Дүйсенбекұлы құттықтау сөзінде.
Іс-шара барысында қонақтар тұлғалық қасиеті таудай Жұмахан Үшкемпірұлын мерейлі жасымен құттықтап, ұстаздық ұлағатының, мол ғылыми мұрағатының жас ұрпаққа үлгі екенін жеткізді. Халықаралық ғылыми-тәжірибелік конферения пленарлық отырысқа ұласты. Ал, Жақсылық Үшкемпірұлы Мырхалықовқа Әуезов университетінің Құрметті профессоры атағы берілді.
«AMANAT» партиясы Түркістан облыстық филиалының баспасөз қызметі