ШЫМКЕНТТІҢ ДАМУЫНДАҒЫ ЕҢБЕК АДАМДАРЫНЫҢ ҮЛЕСІ

Шымкенттің экономикалық серпінін бағалауда өндіріс көлемі, инвестиция, құрылыс пен сауда көрсеткіштерімен қатар, осы нәтижелерді қалыптастыратын еңбек адамдарының үлесі де маңызды. 2026 жылғы қаңтар-тамызда қалада өнеркәсіп өндірісінің көлемі 1 125,9 млрд теңгеге жетіп, бір жылда 12,4%-ға өскен. Құрылыс жұмыстары 191 млрд теңгені құрап, 13,9%-ға артқан. Бұл көрсеткіштердің артында өндіріс жұмысшылары, құрылысшылар, инженерлер, жүргізушілер, қызмет көрсету және басқа да салалардың мамандары тұр.
Еңбек нарығындағы ахуал да қала экономикасының әлеуметтік тұрақтылығын көрсетеді. 2026 жылғы II тоқсанда Шымкентте жұмыссыздар саны 22,4 мың адамды, жұмыссыздық деңгейі 4,6%-ды құрады. Сонымен бірге жастар арасындағы жұмыссыздық 1,8% деңгейінде қалыптасты.
2026 жылдың алғашқы жеті айында 24 731 адам жұмыспен қамту шараларына қатысқан. Оның ішінде 15 964 адам тұрақты жұмысқа орналасып, 2 440 адам уақытша жұмыс орындарына тартылған. 6 327 адам онлайн форматта кәсіби білім алуға бағытталған. Кәсіпкерлікті дамыту бойынша 2 645 азаматқа қолдау көрсетіліп, «Бастау Бизнес» жобасы арқылы 2 542 адам кәсіпкерлік негіздеріне оқуға тіркелген. Еңбек адамының кәсіпкерлік бастамадағы рөлі де артып келеді.
Қалада жаңа жұмыс орындарының ашылуы да экономикалық белсенділіктің маңызды көрсеткіші. 2026 жылы даму жоспары мен жеке бастамалар аясында 9 446 жұмыс орнын құру жоспарланған, оның 9 086-сы тұрақты жұмыс орындары. Ал есепті кезеңде 9 429 адамның жұмысқа орналасуы жоспардың 99,8%-ға орындалғанын көрсетті. Жаңа жұмыс орындары халық табысын арттырып, өндіріс пен қызмет көрсету көлеміне әсер етеді.
Еңбек адамының қала дамуындағы рөлін жалақы динамикасынан да байқауға болады. 2026 жылғы II тоқсанда Шымкенттегі орташа айлық атаулы жалақы 377 710 теңгені құрап, өткен жылдың сәйкес кезеңімен салыстырғанда 9,4%-ға өскен. Нақты жалақы индексінің 99,4% болуы номиналды өсімді баға өзгерістерімен бірге бағалау қажеттігін көрсетеді.
Шымкенттің дамуында еңбек адамының үлесі сандық көрсеткіштермен ғана өлшенбейді. Құрылысшы қаланың жаңа нысандарын тұрғызса, инженер өндірістің тұрақтылығын қамтамасыз етеді, мұғалім мен дәрігер адами капиталды қалыптастырады, кәсіпкер жаңа жұмыс орындарын ашады. Осы тұрғыдан еңбекке деген жауапты көзқарас пен кәсіби шеберлікті қолдау қаланың экономикалық әлеуетін нығайтатын факторлардың бірі болып табылады.