Шымкентте сайлау науқаны аяқталғаннан кейін «Әділет» партиясының қалалық филиалы үгіт-насихат материалдарын жинауға кірісті. Жұмыс «Таза Қазақстан» республикалық акциясы аясында ұйымдастырылып, қала көшелерін, қоғамдық орындар мен тұрғын үйлердің аумағын ретке келтіруге бағытталды.
Тазалық жұмыстарына «Әділет» партиясы Шымкент қалалық филиалы төрағасының орынбасары Ербол Байқонысов бастаған филиал қызметкерлері, «Жастар Рухы» жастар қанатының белсенділері және арнайы мамандар қатысты. Жалпы 70-тен астам адам мен арнайы техника жұмылдырылды.
Жұмыс барысында қаладағы кәсіпкерлік нысандары мен көпқабатты үйлердің кіреберістеріне орналастырылған үгіт материалдары алынып, көшелердегі баннерлер жиналды. «Таза Қазақстан» акциясының негізгі мақсаты – қоршаған ортаны таза ұстау ғана емес, қоғамдық кеңістіктерге деген ортақ жауапкершілікті қалыптастыру. Осыған байланысты партия белсенділері сайлау науқаны кезінде пайдаланған ақпараттық алаңдарды ретке келтіруде.
Айта кетейік, сайлауалды науқан барысында Шымкент қаласында халық көп шоғырланатын орындарға 110 мыңға жуық үгіт-насихат материалы орналастырылған. Сонымен қатар қала аумағындағы 170-тен астам LED экран мен билбордта партияның сайлауалды материалдары көрсетілді.
Партия филиалының мәліметінше, жинау жұмыстары бір күнмен шектелмейді. Қала аумағында қалған үгіт-насихат материалдары толық алынғанға дейін тиісті жұмыстар жалғаса береді.
Comments