А.С.Пушкин атындағы қалалық әмбебап кітапханасында еліміздің басты құжатына арналған «Конституция – ел бірлігі мен әділеттіліктің кепілі» атты салмақты да мазмұнды дөңгелек үстел өтті. Жиынға қоғамның түрлі сала өкілдері қатысып, Ата Заңның мемлекет пен азамат өміріндегі рөлін жан-жақты талқылады.
Іс-шараның ауқымы мен маңыздылығын оған қатысқан қонақтардың құрамынан-ақ аңғаруға болады. Мемлекеттілікті нығайту мен заң үстемдігін қамтамасыз ету мәселелері талқыланған басқосуға келесі тұлғалар қатысты: зиялы қауым өкілдері, жазушылар мен суретшілер, заң саласының жетекші мамандары мен полиция қызметкерлері, тарихшы-ғалымдар мен журналистер, этномәдени бірлестіктердің өкілдері, дәрігерлер мен мәдениет қызметкерлері, тарихи оқиғалардың куәгерлері: Желтоқсан көтерілісіне қатысушылар, Семей ядролық сынақ полигонының ардагерлері және Ауған соғысының ардагерлері.
Кездесу барысында Конституцияның қоғам өміріндегі маңызы, оның құқықтық мемлекет құрудағы айрықша рөлі және әрбір қазақстандықтың құқықтары мен бостандықтарын қорғаудағы орны егжей-тегжейлі сөз болды.
Жиынға қатысушылар тек заңның орындалуын талап етіп қана қоймай, қоғамда құқықтық мәдениетті қалыптастыру мен азаматтық жауапкершілікті арттыру қажеттігін алға тартты.
«Конституция — жай ғана заңдар жинағы емес, бұл — мемлекеттің тұрақтылығы мен әрбір азаматтың қауіпсіздігін, құқығы мен бостандығын қорғайтын басты кепілдік құжат. Заң үстемдігі орнаған жерде ғана әділеттілік пен шынайы бірлік болады» деген ортақ пікірді айтты жиында сөз сөйлеушілер.
Дөңгелек үстел еркін пікір алмасу форматында жалғасты. Тарихшылар Ата Заңның қалыптасу кезеңдеріне тоқталса, заңгерлер мен тәртіп сақшылары бүгінгі таңдағы құқықтық реформалардың барысымен бөлісті. Ал ардагерлер мен зиялы қауым өкілдері жас ұрпақтың бойында патриотизм мен заңға деген құрмет сезімін ұялатудың маңыздылығын атап өтті.
Жиын соңында қатысушылар осындай танымдық әрі тәрбиелік мәні зор кездесулерді жиі өткізіп тұру қоғамдық сананы жаңғыртуға үлкен септігін тигізетінін айтып, ұйымдастырушыларға алғыс білдірді.
Comments