ШЫМКЕНТТЕ «ПРОФСЕРВИС» ЖШС ҚЫЗМЕТКЕРІНІҢ ЗЕЙНЕТ ЖАСЫНА ТОЛУЫ АТАЛЫП ӨТТІ

Шымкент қаласында «YNTYMAQ» кәсіпкерлік жұмыскерлерінің қазақстандық салалық кәсіподағы» республикалық қоғамдық бірлестігінің қалалық филиалына қарасты «Профсервис» ЖШС қызметкері Бахытжан Қайдулдаұлы Досқабыловтың зейнет жасына толуына орай шара өтті.
Жиын барысында «Шымкент қаласы кәсіподақтар орталығы» аумақтық кәсіподақтар бірлестігінің төрағасы Бауыржан Ілімшаұлы Алтеев мерейтой иесін зейнет жасына жетуімен құттықтап, ұзақ жылғы еңбегі үшін алғыс білдіріп, марапат пен сый-сияпат табыстады. Сондай-ақ, ұжымдастары мен әріптестері де өздерінің ізгі тілектерін жеткізді.
Шара барысында Бахытжан Қайдулдаұлы Досқабыловтың еңбек жолы ерекше аталып өтті. «Кәсіптік және өзге де мерекелер туралы» заңнамаға сәйкес, салалық бастамаларды көтермелеу мақсатында, Республикалық «Ұстаз жолы» қоғамдық қорының шешімімен ол көп жылғы Елеулі еңбегі үшін «Еңбек даңқы» медалімен марапатталды.
Бұл марапат — еңбек адамының қоғам алдындағы абыройы мен кәсіби жетістіктеріне берілген жоғары бағаның белгісі.
Адам өміріндегі зейнет жасы — бұл жай ғана күнтізбелік кезең емес, бұл қоғамға, мемлекетке және өз ұжымыңа сіңірген көпжылдық қажырлы еңбектің қорытынды есебі. «Профсервис» серіктестігінің қызметкері Бахытжан Досқабыловтың «Еңбек даңқы» медалімен құрметтеліп, зейнет демалысына шығуы — адал кәсіппен өткен ғұмырдың қаншалықты қадірлі екенін аңғартады. Мұндай сәттер жас буын үшін «жеңіл табыс» пен «дайынға кенелу» секілді өткінші жылтырақтардан гөрі, табанды еңбектің абыройы әлдеқайда биік екенін ұқтырады.
Бүгінгі таңда еңбек нарығында, әсіресе жастар арасында, белгілі бір дағдыны меңгермей жатып жоғары жалақы талап ету немесе еңбек етпей-ақ мемлекеттік игіліктерді тұтынуға бейімділік жоқ емес. Осындай тұста Бахытжан Қайдулдаұлы секілді бір жұмыс орнында ұзақ жыл тапжылмай қызмет еткен, кәсіподақ қозғалысының белсенді мүшесі болған ардагерлердің өмір жолы — нағыз масылдық психологияға қарсы тұратын жанды мысал. Оның «Еңбек даңқы» медалін кеудесіне тағуы — мемлекет пен қоғамның дайын жәрдемақы күтушіні емес, қоғамға нақты құндылық қосқан жұмыскерді ұлықтайтынының белгісі.
Ұжым ішіндегі мұндай құрмет шараларының тәрбиелік мәні зор. Еңбек ардагерлерін лайықты демалысқа шығарып салу дәстүрі өндіріс мәдениетінің жоғары деңгейін көрсетеді. Босаған орынға келетін жас мамандар өздерінің де болашақта дәл осындай абыройға кенеле алатынын сезініп, жұмысқа деген ынтасын арттырады. Еңбек адамының мәртебесі биік қоғамда жалқаулық пен немқұрайлылыққа орын қалмайды, өйткені әрбір азамат өз болашағының кепілі тек жеке еңбегінде екенін терең түсінеді.