Сыбайлас жемқорлыққа қарсы күрес – мемлекеттің ғана емес, бүкіл қоғамның ортақ міндеті. Бұл бағыттағы жұмыстардың басты мақсаты – заң үстемдігін қамтамасыз ету, азаматтардың құқықтары мен заңды мүдделерін қорғау, мемлекеттік қызметке деген халық сенімін арттыру.
Бүгінгі таңда елімізде сыбайлас жемқорлықтың алдын алу мәселесіне ерекше көңіл бөлінуде. Себебі кез келген құқық бұзушылықтың салдарымен күрескеннен гөрі, оның туындауына жол бермейтін тиімді тетіктер қалыптастыру әлдеқайда маңызды. Сондықтан профилактикалық жұмыстар мемлекеттік саясаттың негізгі бағыттарының біріне айналды.
Қатонқарағай ауылдық округі әкімдігі өз қызметінде ашықтық пен жариялылық қағидаттарын басшылыққа алады. Мемлекеттік көрсетілетін қызметтердің сапалы әрі уақытылы орындалуына, тұрғындардың өтініштері мен ұсыныстарының заңнама талаптарына сәйкес қаралуына ерекше назар аударылады. Азаматтармен тұрақты кездесулер өткізіліп, мемлекеттік қызметшілер арасында сыбайлас жемқорлыққа қарсы заңнама талаптарын түсіндіру жұмыстары жүйелі түрде жүргізіледі.
Сыбайлас жемқорлықтың алдын алудың маңызды құралдарының бірі – құқықтық мәдениетті қалыптастыру. Әсіресе жастар арасында адалдық, әділдік және жауапкершілік құндылықтарын дәріптеу – келешекте жемқорлыққа мүлдем төзбеушілік көзқарасты қалыптастырудың негізі. Осы бағытта білім беру ұйымдарымен, қоғамдық институттармен және бұқаралық ақпарат құралдарымен бірлескен іс-шаралар ұйымдастырылып келеді.
Сонымен қатар цифрландыру үдерісі де жемқорлық тәуекелдерін төмендетуге мүмкіндік беруде. Мемлекеттік қызметтердің басым бөлігі электрондық форматқа көшіріліп, адам факторын азайту арқылы қызмет алушылар үшін қолайлы жағдай жасалуда. Бұл өз кезегінде ашықтықты арттырып, азаматтардың мемлекеттік органдарға деген сенімін нығайтады.
Қоғамда сыбайлас жемқорлыққа қарсы мәдениетті қалыптастыру әр азаматтың белсенді ұстанымына байланысты. Әрқайсымыз заң талаптарын сақтап, адал еңбек пен әділдікті басты құндылық ретінде ұстанғанда ғана жемқорлықсыз қоғам құруға қол жеткізе аламыз.
Біздің ортақ мақсатымыз – халыққа сапалы қызмет көрсететін, ашық әрі есеп беретін мемлекеттік басқару жүйесін қалыптастыру. Сондықтан сыбайлас жемқорлықтың алдын алу бағытындағы жұмыстар алдағы уақытта да өз жалғасын тауып, қоғам игілігі үшін қызмет ете береді.
Данияр Касенов,
Қатонқарағай ауылдық округінің әкімі
Comments