18- 22 мамыр аралығында өткен мемлекеттік қызметкерлер арасындағы спартакиадада шағын футболдан Катонқарағай ауданының құрама командасы күміс жүлдеге ие болды. Бұл — жай ғана спорттық нәтиже емес. Тау мінезді елдің, тамыры терең рухтың, туған жерге деген адалдықтың көрінісі еді.
Катонқарағай…
Бұл атаудың өзінде биіктік бар. Бұл өңірдің әр тасы тарих сөйлейді, әр самалы рух оятады. Осындай қасиетті жерден шыққан азаматтардың иығында әрдайым жауапкершілік жүреді. Себебі олар тек өздерін емес, бүтін бір елдің болмысын танытады.
Аудан әкімі Дүйсембаев Данияр Бекқазыұлы айтқан: «Катонқарағай – ол бүкіл қазақтың бет-бейнесі» деген сөзі бекер емес. Бұл — үлкен сенім. Сол сенім футбол алаңында да анық сезілді. Жарысқа барған әр ойыншы қарсыласымен ғана емес, өз намысымен, өз өлкесінің абыройымен ойнады.
Футбол — тек доп қуалау емес. Ол — мінездің майданы. Алаңдағы әр пас, әр жүгіріс, әр тоқтатылған доптың артында тәртіп пен табандылық тұрды. Команда мүшелері шаршауды емес, жауапкершілікті ойлады. Себебі Катонқарағайдың атын арқалап шығу — үлкен аманат.
Кейде жеңіс алтын медальмен өлшенбейді. Күміс жүлденің өзі халықтың жүрегінде алтынға айналады. Осы жолғы екінші орын — соның дәлелі. Өйткені команда тек нәтиже көрсеткен жоқ, олар бірліктің, намыстың, туған жерге деген сүйіспеншіліктің қандай болатынын көрсетті.
Қазір қоғамға дәл осындай рух жетіспейді. Өз ісіне жанын салатын, қай жерде жүрсе де туған өлкесінің абыройын биік қоятын азаматтар керек. Катонқарағай құрамасы осы қасиеттің үлгісін көрсетті.
Алаң сыртында олар — мемлекеттік қызметкер. Ал ойын кезінде — ел намысын арқалаған сарбаздар болды.
Катонқарағайдың азаматтары тағы бір мәрте дәлелдеді: биік тауда туған адамның рухы да биік болатынын.
Қолданды АБЕНОВ
Comments