Қазақстанның рухани әлемінде өз орны бар тұлғалардың бірі — Мемлекет және қоғам қайраткері, Қазақстанның еңбек сіңірген қайраткері, ҚР Парламент Мәжілісінің бірінші шақырылымының депутаты, қазақ тілінде тұңғыш «Халықтың көші-қоны туралы» заңның авторы Әкім Әбдіқайымұлы Ысқақ. Ол — елдік мүдденің, адамдық құндылықтың, имани биіктіктің жыршысы. Ақынның:
«Үйің болып, онда бақыт болмаса…
Адаммын деп айту да онда далбаса!»
— деп басталатын философиялық толғанысы тек поэзия емес, адамдықтың мәнін айқындайтын өлшем секілді. Адамзат рухын бейнелейтін осы жолдарда ақиқатқа негізделген тереңдік бар: нағыз бақыттың өлшемі — ізгілікке толы жүрек, сенімге толы серік, ұстанымға толы ақыл.
Осындай биік дүниетаным иесі Әкім Ысқақ ағамыз — туған елдің тарихын, рухын, тамырын қадірлеудің жарқын үлгісі. Оның Ұлытау төріне, қазақ даласының алтын арқауына деген ілтипаты бекер емес. Себебі Ұлытау — ұлт болмысының мәйегі, тарихтың тірі мұражайы. Хандар ақ киізге көтерілген, ел тағдыры таразыланған, дала заңы жазылған киелі кеңістік. Бұл мекен — ұлттың ұйытқысы, рухтың өзегі.
Ұлытау — жай ғана географиялық аймақ емес, қазақтың әр буынын тәу етіп келген қасиетті орда. Дәл осы өңірде әлемдік тарихқа таңба салған Шыңғыс ханның үлкен ұлы — Ұлық бабамыз Жошының мәңгілік мекені жатыр. Жошы хан кесенесі — қазақ мемлекеттілігінің бастау кезеңін айғақтайтын көне шежіренің тасқа таңылған таңбасы. Оның маңында ғасырлардың тынысы бар, ұлттың жадын жаңғыртатын үн бар.
Әкім Ысқақ сынды қайраткерлердің Ұлытауды еркіндік пен елдік символы ретінде жоғары бағалауы — рухани тамырдан қол үзбеудің, ұлттық сана қайнарын сақтаудың көрінісі. Себебі Ұлытауды қадірлеу — тарихты қадірлеу, ал тарихты қадірлеу — болашақты айшықтау.
Ұлытау — қазақтың қара шаңырағы. Мұнда әр тасы — тарих, әр қыраты — қыран рух, әр төбесі — елдікке серт. Осы мекенді құрметтеу — ұлттың өзін құрметтеуі.
Әкім Ысқақтың поэзиясы мен қоғамға сіңірген еңбегі дәл осы идеямен сабақтас: адамды түземей қоғам түзелмейді, рухты асқақтатпай мемлекет биіктемейді. Оның шығармаларындағы ізгілікке үндеу — Ұлытаудың үнімен үндес, бабалар аманатымен ұштас.
Сол себепті де бүгінгі қазақ елінің рухани кеңістігінде Ұлытаудың да, Әкім Ысқақтай тұлғалардың да орны айрықша: бірі — тарихи тірек, бірі — адамдық бағдар. Ал екеуін байланыстырып тұрған — ұлттық рухтың мәңгілік шамы.
Қобланды АБЕНОВ
Comments