Қазақстан Республикасының «Еңбек нарығын дамытудың 2024-2029 жылдарға арналған тұжырымдамасы» аясында азаматтарға кәсіпкерлік жолында жаңа мүмкіндіктер ұсынып жатқан тиімді бағдарлама жүзеге асуда. Бұл – «Бастау-Бизнес» жобасы.
Аталған жоба бойынша кәсіпкерлік негіздеріне оқыту курсынан өткен азаматтар электронды сертификат алып, өз бизнесін ашуға мемлекеттік грантқа өтініш білдіре алады. Бұл бағдарлама кәсіпкерлікпен айналысуға ниеттенгендер үшін маңызды қадам болмақ.
Оқуға қатысу үшін не істеу керек?
«Бастау-Бизнес» жобасына қатысқысы келген азаматтар business.enbek.kz порталы арқылы тіркеліп, skills.enbek.kz платформасында кәсіпкерлік негіздеріне онлайн курсты өтуі қажет. Онлайн оқыту 14 күнге созылады, бұл курс барысында қатысушылар әрбір модульден кейін аралық тестілеуден өтеді және соңында қорытынды тест тапсырады.
Қорытынды тест сұрақтарының кемінде 70%-ына дұрыс жауап берген азаматтарға бірегей нөмірі бар электронды сертификат беріледі. Бұл сертификат жеке кабинетте сақталып, үш жыл бойы жарамды болады. Сонымен қатар, оқуды аяқтай алмай немесе тесттен өтпеген қатысушыларға жыл ішінде екі рет қайта оқуға мүмкіндік беріледі.
Бұл жоба еліміздегі кәсіпкерлікті дамыту мен жаңа жұмыс орындарын ашу бағытында маңызды қадам болып табылады. «Бастау-Бизнес» арқылы кәсіпкерлікке қызығушылық танытқан азаматтар мемлекет тарапынан қолдау алып, өздерінің бизнес-жобаларын жүзеге асыруға мүмкіндік алады. Олардың бизнеске деген сенімін арттырып, жаңа идеялар мен жобаларды іске қосуға жол ашатын бұл бағдарлама, әсіресе әлеуметтік тұрғыдан осал топтар үшін үлкен көмек болар еді. Мұндай қолдау кәсіпкерлікті дамытуға арналған маңызды шаралар тізбегінде алғашқы қадам болып табылады.
Жоба бойынша оқыту курстарының құрылымы өте тиімді, себебі ол кәсіпкерлік негіздерін үйретіп қана қоймай, қатысушыларға өз бизнесін ашуға нақты қадам жасауға мүмкіндік береді. Электронды сертификат алу және мемлекеттік грантқа өтініш беру механизмдері арқылы азаматтар кәсіпкерлік әлеміне еркін қадам басады. Осы жоба арқылы өз бизнестерін бастауға мүмкіндігі бар азаматтар арасында кәсіпкерліктің жаңа толқыны қалыптасып, еліміздің экономикалық дамуына оң әсер ететіні сөзсіз.
Қатысушылар үшін курстың онлайн форматта ұйымдастырылуы да артықшылық болып табылады, себебі бұл барлық тұрғындарға, оның ішінде шалғай елді мекендерде тұратындарға да қолжетімділік береді. Жыл бойы қайта оқуға мүмкіндік беру жобаға қатысушыларға қосымша ынталандыру мен жеңілдіктер жасап, оларды табысты бизнесмендер қатарында көруге жол ашады.
Мемлекеттік грантқа кімдер өтініш бере алады?
Мемлекеттік грант төмендегі санаттағы азаматтарға қолжетімді:
— Аз қамтылған отбасылардың мүшелері (АӘК алушылар)
— Көпбалалы отбасылар
— Асыраушысынан айырылған жағдайда берілетін жәрдемақы алушылар
— Қандастар мен қоныс аударғандар
— Мүгедектігі бар жұмысқа жарамды азаматтар
— Мүгедек баланы тәрбиелеп отырған ата-аналар
Толық ақпарат алу үшін Ордабасы аудандық мансап орталығына жүгінуіңізге болады.
Comments